13/8/09

Rodiles, lo prohibío


Dalgún efectu purificador debe tener el mar cuando masivamente nos acercamos a él al llegar el buen tiempu. Los maliayeses del s.xix, acudín en coches de caballos a El Puntal a tomar los baños curativos que recomendaben los médicos pa diverses enfermedaes como l’anemia, les afecciones del sistema nerviosu, l’asma crónicu, los apustemes de la piel, y como parte del procesu de rehabilitación por rotures de güesos, esguinces, etc.
Desde los tiempos antiguos, el mar ye sinónimu de salú y bienestar. A ello sumóse, a lo llargo de la pasada centuria, la cultura del ociu. De repente, descubrimos la playa, y ésta conviértese nun escenariu pa la recreación y el descansu. Pal turista d’interior, acudir a la costa ye un imperativu impuestu pol clima y la necesidá de ver el mar. Pa los ribereños prima quiciás –munches veces sin sabelo- la parte profiláctica, relaxante y curativa. La forma en que los vecinos de La Villa esfrutamos de Rodiles, pongamos por casu, ye diferente a cómo lo faen usuarios procedentes d’otres zones d’Asturies o de fuera, siendo importante la cantidá de persones que siguen prefiriendo El Puntal.
La estancia na playa pa nós ye, polo regular, más breve, como de visita de médicu, y sigue teniendo más que ver col bañu que con tomar el sol, como si siguiéramos un ritu ancestral y atávicu, centráu na salú –en bona parte na necesidá d’escorrer l’estrés- perriba d’otres consideraciones.
Nos dos últimos años, cada vez se ven más vecinos de La Villa n’otres playes centro-orientales... El modelu de playa metropolitana diseñada pol Principáu pal arenal de Rodiles, con aparcamientos perfectamente acotaos, zones de dunes vallaes, la ‘preservación’ del ocalital, etc, dificulta l’esfrute de la playa como zona natural, de visita breve, sin acotaciones, sin estaques llendando l’horizonte, sin normes y prohibiciones propies d’una población. La playa ya nun ye un mundu más o menos natural, un mundu aparte que visites a la carta, llibre y purificador, sinon una estensión de la ciudá metropolitana, con códigos urbanos, onde tolo que nun se prohíbe, ye obligación.

2 comentarios:

  1. Hola Portal:

    Prestome enforma , atopar la to bitacora caleyando pela rede . Rodiles yera la mio playa enantes de la masificación , nosotros dibamos a Rodiles a pasar el dia y lluegu la cena en cualquier sidreria de la Villa.Agora nun se si porque con la edad faise uno repunante ya nun vamos tanto .Lo dicho agora que t'alcontre voi seguite en corto.
    Saludos candiales L.luis

    ResponderEliminar
  2. Gracies Xílón, allégrome de que te preste'l blog. Agora ye difícil dir a Rodiles por cuenta la masificación, pero bueno, tamién se pue dir dempués de la marabunta del veranu, ye un sitiu prestosu pa pasiar en cualquier momentu del añu. Un saludu.

    ResponderEliminar