Diz que la Banda de Música de Villaviciosa nun volverá a tocar. Ésta ye una mala noticia, si finalmente se confirma. Cuando calla un músicu apágase una estrella, y aumenta la cacofonía del mundu. Ye una desgracia colectiva que los instumentos s'arrinconen y dexen de sonar. Inoro les razones últimes de qu'esto pueda ocurrir. Desconozo si son motivos económicos o burocráticos, falta de sabia nueva o cansanciu de los responsables; quiciás un tiñalgu de tou ello.
La Banda de Música nació na década de 1880, siendo dirixida por Luis Amandi Martínez, 'Moya', procurador de los tribunales y empleáu municipal; nel 1902 figuraba al frente José Murguía Acosta, al que sucedió Ramón Alonso Vallina, encarceláu durante la guerra civil -la prisión quedaba al cabu del local d'ensayu, ¡coses de la vida!-, que morrería pocu después d'acabase'l conflictu.
En 1938 entama una nueva época, dempués de facese una soscripción popular a tal fin, siendo alcalde Juan Valdés Suardíaz; pel mediu suscitóse una polémica local a causa de la prestación de los instumentos a la banda de La Falange d'Uviéu. En 1939 el xoven músicu y compositor Juan José García Renedo, avezáu ya a la dirección de bandes locales, consigue facese cola dirección de la formación en concursu abiertu. Nel 1959, problemes de tipu económicu terminen prácticamente cola llarga trayectoria de la formación musical maliaya, que nun volvería a renacer hasta finales del sieglu pasáu, 1998, por iniciativa municipal y antiguos componentes integraos na Asociación de Amigos de la Música de Villaviciosa.
Tres directores tuvo nesta nueva etapa: Davil Howard, Juan José García Rodríguez-Renedo, y l'actual, Luis García.
La Banda de Música ofreció la oportunidá a munchos, rapazos y maduros, de deprender un instrumentu, animó actos oficiales, procesiones, fiestes diverses, la Danza del Portal... La Banda fizo remocicar a los vieyos -que tovía recordaben con señaldá los dis heroicos de la formación-, pero tamién se fizo valir ante los escépticos, o los que nun conocín lo que yera una banda d'estes característiques.
De xuru que nun va tocar yá nes prósimes Fiestes del Portal, como tampocu lo fizo na Selmana Santa maliaya, y eso ye un drama, una derrota de la música y del arte. Un aprobetayamientu de la vida cultural de Villaviciosa. Esperemos que los filispos d'esperanza que puedan esistir tovía, se fíen y priendan en prósimes feches.
