Besos prohibíos

Agora que los besos tán proscritos pol Ministeriu de Sanidá a cuenta de la nueva gripe -a toa enfermedá-y correspuende una prohibición y una censura moral-, l’ósculu conviértese, como toa transgresión, n’elementu d’interés creciente, artículu de luxu, y material de confección artística. En realidá, la obra dramática “Besos” qu’acaba d’estrenar nel Teatru Riera de Villaviciosa la compañía Contraste, lleva yá una década rodando pelos escenarios españoles ente reconocimientos de crítica y públicu, pero nesti momentu históricu adquier una nueva dimensión.
Trátase del primer ésitu importante d’un dramaturgu valencianu, Carles Alberola (Alcira, 1964), que ye al empar actor, fundador del grupu Albena Teatre, y personaxe venceyao al mediu televisivo. Carles escomenzó a escribir teatru nos años 90, y entregó’l so últimu llibretu, “13” en 2006. La obra “Besos” ye una pieza realizada a dos manes, en collaboración con Roberto García.
Besu, beisu, beso, baiser, beijo, muxu, kiss, kus, kub... Cada idioma tien la so forma y el so mou de llamalu. La palabra nos nuestros idiomes románicos posee curiosamente una raíz céltica, y como toles palabres antigües y apasionaes, dispón de varios y contradictorios significaos. Según el diccionariu de la RAE, besu ye tantu acción cariñosa como “golpe violentu que se dan dos persones na cara o la cabeza”. Na llingua de Balzac, besar significa también engañar –por aquello de Xudes, de xuro- y amorecer.
De too esto y muncho más trata la obra qu’acaba d’estrenar con ésitu de públicu –les entraes duraron 15 minutos na puerta del colexu, ¡quiero dicir de la taquilla!- y crítica’l grupu Contraste, dirixíu nesta ocasión –eficazmente, a dicir del resultáu- por Laura Iglesias, ún de los pilares d’Higiénico Papel. La lletra contién música, y los actores pasión. Desde principiu a fin l’acción nun escayez, asela cola mutación de colores y acelérase colos decibelios de la música.
Nesta vida hai siempre una melodía pa cada situación, y una situación pa cada melodía. La música relaxa o enraxona, según el momentu y el nivel al qu’hebia llegao la infidelidá na escala de richter. L’humor tolo peñera, y la gran interpretación fai que mereza la pena acercase al teatru, inclusu anque habia que pagar -o pegar- por entrar.

Morrió'l llagareru maliayu Manuel Peruyera, Manolo'l de Coru

Ayer morrió'l llagareru maliayu Manuel Peruyera Peón. Manolo'l de Coru ñació en La Venta Coru en 1926. Yera un llagareru de los d’antes, fíu de llagareru, bebedor -nunca lo dexó pesie a les recomendaciones del médicu-, gran entendíu... Tenía un humor irónicu mui asturianu. La suya fue una vida entera ente toneles. Dexa viuda y dos fíos. So pá, Ceferino Peruyera, abrió’l llagar de Coru a la vuelta d’América. Corría l’añu 1914, el de la Gran Guerra europea, pero’l negociu diría, pali que pali, a más. Manolo crióse ente mayos, verines y bombes de tresegar a mano (como la que sal nel semeyu, de los años 40, nel que sal Manolo dándo-y al rabil de la bomba de tresegar). Nun había munches posibilidaes d’estudiar daquella: “daba clases con Agustín Zamorano en La Quinta”, les cuatro regles mayormente. En realidá, “la sidra ye la mi vida desde piquiñín, la única carrera qu’estudié”, reconocía nuna entrevista que-y fixi fai unos meses y que figura ente los post antiguos d'esti blog.
El vieyu llagar de Coru llegó a aprosimáse a les mil pipes de sidra mayaes na época de mayor producción. Vendín sidra en Xixón, Uviéu... Abastecín a Casa Portal en Madrid, cuando dir a la capital yera una aventura exótica. Manolo medró nesti mundu a la sombra del padre. En 1960 llegó`l momentu de baxar a La Villa, y construyó la primera nave. Col tiempu formarín un gran llagar na carretera de Fuentes, de la que s'ocupaba yá mayormente nos últimos años el so fíu, Manolo. Morrió de repente, cuando se subía al coche pa dir al hospital de Cagüeñes a una revisión ordinaria. Antes cargó nel maleteru una caxa sidra pa lleva-y médicu. Entiérrase ésta tardi. El nuestru pésame a la familia.

Una Casa-Muséu pal artista Rubio Camín en Valdediós

La muerte de Joaquín Rubio Camín (Xixón 1929-2007) privó a Asturies d’un gran creador, d’un gran artista integral y con una sensibilidá especial. Fai dos años que desapareció físicamente, pero la importante obra que formó en vida nun s’esmució con él. La familia tien l’enfotu de que la casa na que viviera desde 1975, na parroquia maliayesa de Pueyes, se convierta nuna Casa-Muséu del autor... Veremos si la iniciativa prospera.
El proyectu tien varios vientos en contra: la falta d’una sinceru interés hacia la creación artística, a nun ser que se trate d’un productu procedente de Berlín o Nueva York; la incompresión hacia aquelles propuestes estétiques que tienen en cuenta la biodiversidá que nos arrodia, que nos envuelve y identifica anque nun l’apreciemos; l’apueste de los poderes públicos poles llamaes factoríes culturales –Niemeyer, Llaboral, Muséu de la Prehistoria...- que reducen la cultura a hormigón y ufierta turística.
La política confunde cultura con infraestructura. Nesti comienzu de centuria, los pintores y escultores son menos importantes que los arquitectos. Calatrava o Foster lleven camín d’eclipsar a Camín. ¿Camín? ¿Quién ye Camín? Igual da que nos refiramos a Alfonso Camín qu’a Rubio Camín, igual da que digamos pintura que poesía, Porceyu que Valdediós. Asturies ye inxusta colos suyos, anque los suyos seyan pegoyos fundamentales de la cultura asturiana, y proyección de la so vocación universal.
L’arte convirtióse nuna mercancía nesta Asturies iconoclasta y gamberra, que prefier ser fotocopia de cualquier cosa llegada de fuera que correa tresmisora d’una realidá propia, definida, identificable... Nuestra. El nuestru artista pintó, esculpió, escribió... Amó munches coses: ehí tenemos la recopilación qu’acaba facer Cubera, una riestra d’articulinos ilustraos con plumilles propies que presta ver xuntes, como muestres de la so ferviente almiración por ésti mundu que-y da la espalda.

Fronteres, un debate que repuna

Cualisquier debate sobre la cuestión llingüística -y más la que cinca a los pleitos fronterizos- termina siendo una espirica política, o lo que ye lo mesmo, una espirica esquizofrénica, ensin salida racional. Nun hai nada que facer. La realidá llingüística n'Asturies ye la historia d'una llaceria anunciada, y encima -perru flacu tou son pulgues- complícase con esti enguedeyu de denominaciones, fronteres, pertenencies, nacionalidaes, filoloxíes, politiqueríes... Esta mierda de quítate tu pa poneme yo onde se mez -como nuna termomix- un mecigayu ensin sentíu onde la llingua termina siendo lo menos importante, y onde los que corten el bacaláu azorramplen, y terminen engardiéndose los tontos del pueblu -o de los dos pueblos-, los que nada deciden. Mientres tantu la mancha va espardiéndose, la mancha de la uniformización. Felicidaes a los que tienen les coses tan clares, un premiu virtual a esa xente tan solidario que nos vien a salvar a los asturianos de la nuestra inorancia, tán consiguiéndolo. Graciñas.

Un bon videu que llegará a Javier Fernández

Ésti día presentóse, nel trescursu del actu de la Fundación Caveda y Nava celebráu en Villaviciosa, un videu sobre la situación del asturianu. Creo que se trata d'un bon trabayu que resume de forma esquemática pero eficaz los problemes que carez anguaño la llingua, y polo que la fundación rispe, que ye una oficialidá progresiva que nun suponga obligatoriedá, pero tampocu conculcación de los derechos de los falantes, que ye lo qu'ocurre anguaño, como denuncia la grabación. El videu, que dura pocu más de cinco minutos -subvencionáu pola Conseyería de Cultura (?), y la Caxa Llaboral- tuvo bona acoyida ente dalgunos de los cargos electos socialistes ellí presentes, que se comprometieron a facelu llegar tanaína al secretariu xeneral del PSOE n'Asturies, Javier Fernández; a ver si se-y ablandia corazón un pistañu.

Vicente Gotor, nuevu miembru d'honor de la Fundación Caveda y Nava

Villaviciosa acoyó, un añu más, los actos organizaos pola Fundación Caveda y Nava n'homenaxe al ilustráu maliayu y l'acoyida d'un nuevu miembru d'honor: el rector de la Universidá d'Uviéu, Vicente Gotor. Con más públicu de lo habitual desarrollóse la ofrenda floral delantre la casa de Caveda, con una intervención d'Etelvino González, la llectura de poemes de Nené Losada, y la interpretación d'una pieza de gaita a cargu de Pelayo Coalla. Darréu, l'escenariu treslladóse a la sé de la Fundación Cardín, en La Oliva, onde se celebró l'actu d'acoyida de Gotor como nuevu patronu de la fundación. Pronunció'l discursu d'entrada Xosé Suárez Arias-Cachero, quien emponderó'l llabor académicu del actual rector y l'actitú respectu a la llingua asturiana, comparando la so figura cola del so antecesor nel cargu, Fermín Canella. Gotor, pela so parte, pronunció un discursu n'asturianu, na que defendió la vocacion asturiana de la Universidá uvieína, y la necesidá de cumplir col mandatu llegal no tocante a la llingua; al empar, agradeció de forma candial el reconocimientu que supón el so recibimientu na Fundación Caveda y Nava. Darréu dixo unes palabres la Directora Xeneral de Política Llingüística, Chelo Vega, rematando l'actu'l presidente de la Fundación, Inaciu Iglesias, quien fixo un repás a la situaci´n del idioma y les carencies que tien la política llingüística, si bien punxo l'énfasi nel compromisu que debe tener la sociedá nel procesu de recuperación llingüística. Destacar igualmente la presentación d'un videu sobre'l momentu actual que vive l'idioma, cómo lu ve la Fundación, y por qué aboga, un videu mui bien fechu que resume perbién la situación de la llingua. Al actu asistieron los alcaldes de Villaviciosa, Manuel Busto, y Cabranes, Alejandro Vega, así como la edil de Cultura maliaya, Ana López.

Un acontecimientu perimportante. Felicidaes al CAO y a tolos que participaron nesti entamu en favor de la oficialidá

.
Soi de los que creen que se puede facer abondo pola llingua si hai voluntá y organización, con oficialidá y ensin ella. Que la falta d'oficialidá nun pue ser escusa pa nun desenrollar la xera que ta nes nuestres manes, y que nun se lleva a cabu, o polo menos nun se desenrolla cola continuidá y la intensidá necesaries. Na mayor parte d'Asturies nun hai una mínima organización que trabaye pola normalización social del asturianu. Hai xente faciendo coses -zona central, núcleos grandes-, pero nun ye abondo, por mui valoratible que nos abulte esi llabor, sobre tou en dellos casos como'l de la Xunta Pola. Falta coordinación, estremar la reivindicación de la normalización social, y de la política, y primar l'esfuerzu y la xermandía ente la xente que trabaya na mesma estaya.
Viví un tiempu nel País Vascu -yá sé, yá sé: ye otru procesu- y llamóme l'atención la constancia de la xente nel trabayu diariu, na organización, la responsabilidá individual y colectiva que podía esistir nuna pequeña población, con una pequeña asociación trabayando de forma continuada na normalización cotidiana del euskera. Feries, actividaes culturales, apoyu a la Korrika..., pero sobre tou, influencia nos acontecimientos cotidianos, na información, na dignificación... del idioma. (¡Y tienen oficialidá!, pero nun apigacen porque tovía queda munchu por facer ellí, onde aumenten los conocedores del idioma pero non los usuarios habituales).
Pero esta reflexón nun quita un res d'importancia a la reivindicación d'otru estatus llegal pa la llingua. Ye irrenunciable, toi d'acuerdu: imprescindible. Ye verdá que con oficialidá nun se resuelve'l futuru del idioma, pues que si nun hai verdadera voluntá política por parte de les instituciones, y sin apoyu d'otres instituciones académiques, culturales y sociales, nun se llogrará colocar un torniquete que pare la sangría permanente de falantes. La oficialidá nun ye abondo pero resulta imprescindible. Tien un valor nel tarrén de lo simbólico, y tamién produz efectos xurídicos inmediatos. La llingua precisa ser mostrada ante los propios falantes con una apariencia digna que contrarreste tanta insidia, desinformación, prexuiciu llingüísticu, xuiciu políticu... Y necesita tener un michinal, anque sea pequeñu, onde guarecese de la tormenta. Pero entrín y non, la llingua merez que-y construyamos -los que creyemos nella- un abellugu dignu, que tenga como encontiu un trabayu continuáu, gregariu, solidariu y seriu.
Felicidaes al CAO en xeneral y especialmente a Fernando Ornosa, un trabayador incansable por una idea d'Asturies. Un abrazu.