Prestosa presentación de 'Pelegrinos del abismu' en Blimea

El pasáu xueves día 5 presentóse na Casona del Bravial de Blimea, sé de la Oficina de Normalización Llingüística del conceyu de Samartín del Rei Aurelio, el llibru 'Pelegrinos del abismu'. L'actu tuvo llugar ante un públicu xuvenil de primero a cuarto de la ESO del institutu Juan José Calvo Miguel de Sotrondio. Yera un actu organizáu por Hugo Cortina, responsable de la oficina, que fue presentáu pol tamién escritor Xosé Ramón Ardines. Cerca de trenta alumnos d'asturiano, que lleeran previamente'l testu, tuvieron la oportunidá de facer entrugues sobre esta novelina xuvenil, publicada l'añu pasáu pela ALLA -que la premió en 2009-. L'actu, organizáu nel marcu de la Selmana de les Lletres Asturianes, resultó mui prestosu y animáu.

La llibrería de Calixto

Na Plaza del Generalísimo de Villaviciosa, tamién llamada del Güevu, había daquella –a comienzos de los ochenta- un sitiu de venta de periódicos conocíu por Casa Calixto, onde’l paisano que despachaba –un daqué foín y malencaráu- anque se llamaba Luis respondía pol nome del suegru, fundador del negociu. Tratábase d’un local de madera perantiguu y foroñosu, cuyes parés permanecín enllenes de carteles de cuando Manolete o más p’atrás y dalgún retratu de la dictadura, y el suelu aparecía estráu de periódicos vieyos de cuando les últimes –yeren frecuentes entós en La Villa- inundaciones.
Mayormente vendía periódicos: tolos asturianos menos Región, que tenín n’esclusiva na Imprenta Vallín del Ancho. También dellos diarios de Madrid, destacando poles ventes l’Abc. Ufiertaba Calixto tamién noveles del oeste y dalgunes revistes non demasiao porconzones, magar que recuerdo una portada escolforiada de Raquel Welch que tuvo más salida aquellos díes que’l timoratu diariu monárquicu. Completaba’l xéneru a la venta dalgún llibru –escasu eso sí, nun fuera haber protestes de los prohomes locales; daquella un llibru tovía resultaba sospechosu, fuese’l que fuese’l so conteníu.
El casu ye qu’aquel domingu, cuando fui a buscar puntualmente el mio Diario 16, rellumaba nun de los estantes con puerte de cristal un llibru raru, perraru. “Calixto, ¿qué llibru ye esi?”, entrugué, y Calixto, osea Luis, mirándome de revisgu, con aquelles gafes de montura gruesa esboligando pela pendiente de la ñariz abaxo, camín del abismu, y encoyéndose d’hombros, gorgutó: “¡Dejárenlu ahí!”.
Tratábase del Garrapiellu lliterariu asturianu, un volume de poemes y cuentos d’un tal Mánfer de la Llera. Munchu tiempu dempués enteréme que’l propiu autor s’encargara d’editalu en 1983 y distribuílu per unes cuantes llibreríes o puestos de periódicos, lo que cuadrase -en Villaviciosa nunca proliferaron les primeres-. Destacaba nel volume la temática minera. Preferí la narración a la poesía. Llamóme l’atención la bayura del vocabulariu, un daqué exóticu pero fondamente cercanu, la prosa palpitante, viva, reivindicativa y normalizadora. Fue’l mio primer llibru n’asturianu y nunca m’escaeceré d’él, nin del so autor. Sirvan estes lletres de modestu homenaxe a la so figura nesti Día de les Lletres. (Voz de Asturias 6/5/2011)

Los cabraneses de L’Habana (2)

La guerra cubana diezmó a los asturianos y les propiedaes que tenín na isla, hasta llevar a munchos d’ellos a la ruina. Según el censu del gobiernu d’ocupación americanu de 1899, los españoles de nacimientu yeren entós 129.236 (la población total sumaba 1’5 millones d’hab.) Suponíase que se reduciría la cifra cuando Cuba caminase sola, pero ello nun fue así: nes décades siguientes docenes de miles de peninsulares embarcaron rumbu a la isla caribeña buscando fortuna.
En 1919 un emigrante llegáu a Cuba desde Santolaya de Cabranes faríalo mayormente nun barcu español como los de la compañía Herrera. Desembarcaría nun muelle propiedá d’una empresa española. Si s’acercaba a cualquiera de les ilesies de L’Habana Vieja a dar gracies a San Francisco por llegar al destín sanu y salvu, podía acudir, sin movese del puertu, al conventu de San Francisco, a la ilesia de Paula –bastida en parte pola empresa del tranvía-; tamién tenía cerque la señorial de La Mercé –de bóvedes bayurosamente policromaes-, a la de San Francisco d’Asís…; ye mui probable que l’oficiante fuere un de los 426 cures peninsulares qu’exercín en Cuba. Si quería comprar daqué, podría ser atendíu por un de los 28.292 españoles que trabayaben nel ramu del comerciu –normalmente asturianos y gallegos-. Si llegaba con fame, podía acudir a un bar o restaurante, cuyu propietariu mui seguramente yera de la mesma nacionalidá.
Si comía sentáu, ye probable que la mesa y la tayuela fueran ellaboraes por firmes como Gancedo y Crespo, cuya procedencia nun fai falta esplicar. Si garraba una xarré pa treslladase, yera fácil que lu llevara un de los 3.313 españoles qu’exercín l’oficiu de cocheru. Si un día xuntaba unos pesos y mercaba un gochín pa invitar a los amigos a un asáu, lo más probable ye qu’acudiera a un de los 59.403 españoles que nesi añu figuren como agricultores na isla. Si tomaba un vinu, sería de xuru procedente de la Rioja. Si pidía una cerveza sería de La Polar o La Tropical, dambes marques fundaes por españoles en Puentes Grandes. Si-y pruyía la señaldá y necesitaba meter sidre en vena, podía acudir a dalguna tabierna céntrica d’asturianos, pongamos la de Manín, n’Obrapía, onde se vendía sidre de Villaviciosa del tonel, o embotellao: Cima, El Gaiteru....
Si-y petaba lleer un periódicu, bien podía ser el del maliayés Nicolás Rivero, el Diario de la Marina, el de mayor tirada y difusión per aquelles tierres. Mientres lu lleía, el cabranés podía fumar un puru, pongamos un Flor de Cano, fabricáu pol español J. Cano. Si quería dir a una fiesta selecta, podía escoyer ente docenes de sociedaes asturianes y españoles asitiaes nel Malecón, el céntricu Prado o Parque Central, pero tamién nel señorial Vedado, n’El Cerro, Marianao… Eso solo en L’Habana. En cada pueblu de la isla, por pequeñu que fuere, l’emigrante de Santolaya atoparía –atopó- l’apoyu y la solidaridá d’un hospital asturianu o un casinu español.

Los cabraneses de L'Habana (I)

Julio González Tirador, pesie a tener raíces riosellanes, ye l’actual presidente de la Unión Cabranense de L’Habana. Sustituyó al recordáu Mario Gª Granja, que tornó a casa después de mediu siglu. L’asociación agrupa a los naturales de Caravia, Villaviciosa y Cabranes, siendo’l más ilustre de los sos miembros el caraviense Constantino Díaz Luces, verdaderu ‘discu duru’ de la memoria asturiana de Cuba.
Tirador ye un home hiperactivu y amable, con fondes raíces nesta tierra. So güelu formaba parte de la colonia hispana de Bejucal durante la guerra cubana y como tal lu trataron los ‘mambises’ cuando, a causa de la gran resistencia que mantenín los peninsulares naquella plaza, quemáron-y toles propiedaes por orden del ‘padre de la independencia’ Máximo Gómez.
Ya queden pocos asturianos y menos cabraniegos na capital, dientro de la Unión Cabranense malpenes 9, pero la sociedá goza de bona salú yá que cuenta con más de quinientos socios, que participen habitualmente nes sos actividaes, especialmente les comides de fin de añu y la de la Santina; una fecha señala –como nun podía ser d’otra manera- pa tolos asturianos, qu’organicen una misa nel hogar Santovenia, una comida… Santovenia ye una de les quintes que construyeron los emigrantes nel barriu d’El Cerro, zona residencial y d’espansión de L’Habana, onde s’afayaba igualmente –ellí siguen- la Quinta Covadonga, el Centru de Dependientes del Comerciu...
La procesión de La Santina pel Cerro yera antiguamente multitudinaria. La xente echaba flores y rames al so pasu y participaba nuna gran xira, que más parecía una romería de cualquier puebu asturianu. El Cerro ye pa los asturianos un símbolu del pasáu esplendorosu que, quiciás dalgún día, retorne.
Tirador comentanos la celebración esti añu del centenariu de la Unión Cabranense, al que-yos gustaría qu’asistiera l’alcalde de Cabranes: “Ya sabemos qu’anda mui ocupáu, pero si usté pue dicí-y algo…”. Llamóse primero Club Cabranense, pero en 1917 hubo una división interna qu’allumbró a los Hijos de Cabranes, que finalmente se xuntaron na sociedá actual.
(Semeyu antiguu Centru Asturianu de L'Habana. En primer términu Monumentu a Martí)

Morrió Tano Collada

Morrió esti día Tano Collada. Amás de ser el padre, tíu, güelu, suegru… de varios amigos, yera una persona conocida en La Villa y verdaderu patriarca d’una familia grande y apreciada. Tano siempre me pareció un paisano de los d’antes, pero sin les zunes de los de antes, un home educáu, seriu na acepción más seria de la palabra; abiertu y amable.
Los que lu conocín bien nunca-y escucharon una palabra más alta o más áspera qu’otra, sacando situaciones puntuales en que la situación requería alzar la voz. Yera un paisano con convicciones al que-y tocó vivir momentos difíciles. Pertenecía a una familia de L’Algara (Amandi), y contribuyó a formar otra más grande en Llavanderu (Fuentes), nuna casa abierta a tou’l mundu. Recordaba esti día Angelina qu’en 65 años de vivir xuntos pasaron un poco de tou, anque primaron siempre l’optimismu y les satisfaiciones.
Nació cuando terminaba la I Guerra Muncial y en París decidíase que nunca más volvería haber una guerra, pero tal declaración quedó pronto pa prau, pues la guerra marcó’l s. XX, especialmente dura a esti llau del mundu fue la guerra civil y la terrible posguerra. Esa esperiencia marcó tamién a Tano, que yera una persona con conciencia, y supo tresmití-yos la so forma de ver el mundo a los fíos.
Tano mantuvo intactes hasta l’últimu momentu les sos facultaes, y sobre tou la cordura. Lo importante nun ye llegar a vieyu, inclusu llegar a ser mui vieyu resulta relativamente fácil nesta época d’avances nel campu de la salú, sinon ser tu, saber siempre quién yes, conocer a los que t’arrodien, disfrutar de la vida hasta’l final como fizo él.
Conocí a una muyer na residencia a la que siempre-y gustó cantar asturiano, pero la vieyera mermó-y les facultaes d’antañu, y así, cuando-y piden que cante algo, suel contestar: “pa cantar hai que tar acordies”. Pa cantar y pa vivir, suscribiríalo Tano, hai que tar acordies.

Presentación d' Oh 36! y Poison nel Club de Prensa Asturiana

Esti miércoles, día 16 de xunu, a les 19 hores. Presentaránse nel Club Prensa Asturiana d'Uviéu les obres de teatru Oh 36! y Poison, de Lluis Portal, qu'acaba de sacar a la lluz la editorial Universos y que recibieron el Premiu Uviéu a la producción dramática. Prestaríanos contar cola vuestra presencia.

La novela prohibida de Palacio Valdés

Cardenal Segura: “Prohibimos la novela “La fe”, de D. Armando Palacio Valdés, faciendo saber a los fieles qu’incurrirán en pecáu grave los que quebrantaran esta prohibición Nuestra”

El conceyu llavianés acaba de reeditar una novela fundamental del ilustre escritor asturianu Armando Palacio Valdés (Entrialgo, 1853 - Madrid, 1938), “La fe”. La edición, la introducción y les notes débense al incansable estudiosu –espertu na obra d’esti escritor-, Etelvino González López. L’investigador maliayés desentrelliza como nunca antes s’había fecho toles claves de la novela, mui maltratada cuando la so publicación en 1881 y en décades posteriores.
Sorprende, según Etelvino “lo mal lleída y mal interpretada” que fue la polémica obra, reeditada siete veces de forma autónoma y otres cinco en volume recopilatoriu, circunstancia esplicable si se tien en cuenta qu’aborda el conflictu relixosu “de forma complemente nueva”, como apuntaría’l so amigu íntimu Leopoldo Alas. Hai que recordar que, nel “súmmun” de la intolerancia relixosa, la censura denegó la posibilidá d’imprimir la obra en varies ocasiones.
Cita González al ministru d’Información, Gabriel Arias Salgado, que denegó reiteradamente la entrada del testu n’imprenta nel periodu de 1951-1962, aplicando la máxima: “Tola llibertá a la verdad, nenguna al error”, lo que se traduz nuna instrucción contundente: “Tomaránse cuantes midíes sean necesaries pa evitar que s’edite “La fe” de Palacio Valdés, o bien –casu que s’hubiere editao con autorización o ensin ella- que m’informe de los procedimientos oficiales pa evitar la so difusión”.
Pero, ¿qué esmolía tanto a les autoridaes? Pues la dulda. La vacilación nes sos creencies de D. Gil, un curín mozu y sensible ante’l mundu imperfectu que lu arrodia, ye un mal exemplu pal nacional-catolicismu imperante nesa dómina. L’Estáu confesional considérase na obligación d’imponer, con tou tipu de midíes coercitives y censores, una determinada creencia. “Clarín” yá anunciara la incomprensión qu’atoparía la obra; asegurábalo él desde la absoluta identificación cola novela - un testu de triba costumbrista, enmarcable dientro del realismu del XIX- y el que la firma, pero conocedor de la sociedá española del momentu.
L’autor de La Regenta comenta por carta al llavianés: “Parezme la to meyor novela”. Etelvino González destaca igualmente la importancia de la obra, qu’inspiraría, según José Luis Campal, creaciones de Pérez Galdós –“Nazarín”, 1895- y Unamuno –“San Manuel Bueno, mártir”, 1930- a la hora d’abordar el tema de la dulda.
El casu ye que l’argumentu nun solo impactó a los católicos españoles, sinon tamién a los cristianos d’otros países y confesiones. Hai que recordar que Palacio Valdés ye un de los dos o tres novelistes españoles más traducíos y lleíos fuera d’España durante’l diecinueve. Ye interesante citar lo qu’escribió sobre esti particular Francisco Acebal en 1904 en “Alma asturiana”: “Les noveles de Palacio Valdés circulen por Gran Bretaña como por patria propia, de tal manera l’alma asturiana empareya col espíritu saxón y divórciase de les sos ximielgues galaica y montañesa”.
Valdés ye lleíu y entendíu fuera; Palacio recibe cartes de llectores ingleses que comprenden y dicen sintise reconfortaos cola llectura de “La fe”. Pero resulta evidente que la obra habría de crear polémica: “Yera lóxico que la novela escandalizara”, reconozco Etelvino, “el títulu mismu endicia a ello”. Tal ye la polémica entamada que’l propiu autor vese obligáu a dar esplicaciones publicamente, en forma d’introducción, na siguiente edición de la obra, y de pasu calmar los ánimos. El nuestru autor publicare nueve noveles anteriores, más dalgún ensayu como críticu lliterariu, como’l firmáu a comuña con “Clarín”, “La literatura en 1881”, y esti estremu pesa na actitú del escritor, enfotáu en non perder llectores, como indica Campal, porque vive d’ellos.
Ésti últimu, na so “Recepción madrileña de La fe (1881)”, da cuenta del ampliu ecu que l’aparición de la novela tuvo na prensa de la dómina: El Imparcial, La Época, El Liberal, Nuevo teatro crítico, La época moderna... Les opiniones son variaes, normalmente positives cuando cinquen a la ficha técnica del testu, pero negatives cuando recurren al xuiciu moral. Calificativos como “entretenida”, “estilu fácil y cenciellu”, etc, resumen la forma de narrar de Palacio Valdés, y faen atractiva y prestosa la so llectura. Pero nel momentu nel que s’analiza la conducta del protagonista salten los resortes de la censura, rayando dacuando na insolencia y nel insultu.
L’agustinu Blanco García califíca’l testu de “novísimu enxendru”, “melodrama sainetescu” y de “impíu y siniestru”. Hasta Emilia Pardo Bazán se tira al altu al falar de les “referencies degradantes” de la historia. Pero más dañible sería l’obleru de dellos relixosos, como la del arzobismu de Sevilla, el cardenal Pedro Segura, que consideraba “reprobable” la obra desde’l puntu de vista moral y relixosu, pero sobremanera ye “escandalosa” y hasta “peligrosa” no que se refier a la “dulda relixosa d’un sacerdote, encetada por un impíu que muerre asosegadamente na so incredulidá, y los amores sacrílegos d’una beatra histérica”. Básase’l mitráu, según González, na opinión del xesuíta y críticu lliterariu Pablo Ladrón de Guevara, qu’escribe ensin arrodios: “Palacio Valdés, malu por dambes bandes, ye incrédulu. Novela “La fe”. Defensa del ateísmu, descréitu de los cures nún que se fai incrédulu”.
Así les coses, dispuestu a estripar dafechu la “incredulidá” d’esti mundu, el señor arzobismu decreta lo siguiente: “Prohibimos la novela “La fe”, de D. Armando Palacio Valdés, faciendo saber a los fieles qu’incurrirán en pecáu grave cuantos quebrantaran esta prohibición Nuestra”, como recueye’l Boletín Oficial del Arzobispáu de Sevilla de 12 de setiembre de 1947.
L’acción trescurre en Peñascosa –Lluanco-, y protagonízala’l sacerdote D. Gil, que poco dempués de quedar güerfanu de padre pierde a so madre nun actu suicida del que él llogra salvase milagrosamente. Tuteláu por una familia importante de la villa el rapaz conviértese nun virtuosu sacerdote, que vuelve al pueblu a exercer el ministeriu, viéndose col tiempu enredáu nuna trama que lu lleva a duldar de la so fe.
Esta circunstancia nun supón, según Etelvino González, una afirmación d’ateísmu del autor –que siempre fizo gala de los sos principios católicos-, sinon tolo contrario, el sacerdote atraviesa un momentu de crisis que nun ye más qu’una transición o catarsis mística que conduz a la reafirmación interior de la propia creencia: “Na novela descríbese un procesu depurador de maduración de la fe”. Trararíase “d’un alcuentru col racionalismu y una confrontación cola ciencia: el verdaderu pánicu cáusalu’l pesimismu noseolóxicu; el kantismu furtába-y la misma realidá”. Fai un correllatu Etelvino de la esperiencia vivida pola madre Teresa de Calcuta, y pregúntase si’l so escayimientu confesu d’ésta “¿sería tamién una perda condenable de la fe?”. La respuesta dala’l propiu llavianés: “D’homes ye duldar, non d’ánxeles nin de besties”. (La Voz de Asturias, 2.Xunu.2010)