GOLDONI NEL DÍA MUNDIAL DEL TEATRU

Cada 27 de marzu, desde 1961, celébrase simultáneamente en cien países el Día Mundial del Teatru. Estrénense obres, danse conferencies, publíquense llibros, revistes... pero sobre tou ye una oportunidá pa repetir esa ceremonia, esi ritual vinculáu a toles cultures d’una o otra forma, y de la qu’arranquen tantes espresiones artístiques. Desde les antiquísimes representaciones dramátiques n’honor a Osiris a orielles del Nilu; los ecos d’Esquilo o Sófocles que tovía s’escuchen n’Epidauro o a los pies de l’acrópolis ateniense, nel Teatru de Dionisio; los espectáculos romanos n’establecimientos de madera...
Villaviciosa súmase a esta celebración col estrenu nel Riera d’una obra del clásicu de la escena, ún de los padres de la Comedia Italiana, y impulsor de la popular Comedia dell’Arte, Carlo Goldoni (Venecia, 1707 – París, 1793). Trátase d’un estrenu absolutu, y tenemos que felicitanos por ello, yá que ye una gran oportunidá de disfrutar del buen facer d’un de los principales colectivos teatrales del país: La compañía profesional Nun Tris Producciones, que lleva a escena la so versión asturiana de la obra de Goldoni “Il Servitore di due padroni”, una de les primeres pieces compuestes pol dramaturgu venecianu en 1745, y una de les más representaes del autor y del teatru italianu de tolos tiempos.
Trátase d’una de les más representatives pieces desi tipu de comedia qu’utiliza l’enredu, l’humor, l’acción trepidante, la mázcara... como señes d’identidá fundamentales. La obra ye un ésitu aseguráu polo atractivo y orixinal de la trama, a más de ser apta pa tolos públicos, y la entrada ye llibre (sábadu, 27 de marzu, a les 20 hores nel Teatru Riera). Nun hai disculpa pa nun acudir a vela.
La redacción corresponde a la maliayesa Inma Rodríguez, vinculada familiarmente con Sietes, y como ayudante de direición figura’l polifacéticu Toño Caamaño, ún de les figures más versátiles de la escena asturiana.

El cura de Fuentes

Acaba de reeditase un curiosu llibrín en bable, “Los artículos de la fe”. Un catecismu publicáu en 1916 por Luis Sánchez García (Uviéu, 1879). D’esti curín sabemos que pasó dos años como capellán de Bode y Pendás (Parres). Fue coaxutor de Coya (Piloña) en 1906. Ecónomu de Pendás en 1907. Rexente de Tobes (Ribadeva) en 1909. Coaxutor de les parroquies de Samartín de Vallés y Sietes (Villaviciosa) de 1910 a 1918. Lluego, permanecería una temporaína fuera, y vuelve al conceyu maliayu, concretamente a Grases, en 1919. Ye párrocu de Rales en 1920. En 1943 pasa a la parroquia de Fuentes, onde continúa realizando’l so llabor pastoral hasta la so muerte, ocurrida’l 29 de xineru de 1964.
Trátase de la primera “doctrina” escrita en bable, inspirada nel Catecismu Romanu, El Perrone y les Sagraes Escritures. Nun pretende facer un testu pa espertos, esplica nel prólogu: “Ta escrito pa rapazos (y anque sea pa vieyos d’aldea y xente sencilla), non pa tiólogos y doctores, qu’esos ya saben dir a les fuentes”. “Y ta asina en bable porque paez qu’asina llamará más l’atención de los rapaces y lierán más; y liendo más, deprenderán más; y deprendiendo más... ¡Ai! home, va cambia’l tiempu, porque esti rema...”, aclara con humor.
D. Luis escribió estes 78 fueyes nel periodu en que permaneció na parroquia de Vallés, pero col tiempu perdióse’l rastru del llibru, hasta qu’hacia 1980, el cura de Santogenia –y profesor nel institutu maliayu-, Eduardo Solís, atopólu casualmente y púnxolo en conocimientu del tamién profesor y miembru de l’Academia de la Llingua, Roberto Glez-Quevedo. Pocu dempués –en 1981- l’ALLA volvía a asoleyar el vieyu catecismu añadiendo-y un prólogu del cura de La Pola, Carlos Sánchez Martino, natural de Sietes, y un epílogu de Roberto, contestualizando la obra.
La tirada fue pequeña y pronto desapareció de les llibreríes, por esa razón facíase imprescindible cuantayá volver a reeditalu. El volume será presentáu’l prósimu Día del Llibru nun actu al que s’espera asistan los protagonistes d’esta historia... Cásique toos, pues falten Martino y el propiu D. Luis, un cura recordáu y apreciáu en Fuentes, onde, a pesar de les goteres de la casa rectoral que lu obligó munches veces a metese col paragües na cama, sintíase como ún más del pueblu.

Xurde Blanco na Cope

Una “ceremonia” mui especial n’Arbazal

.

.
Facía fríu n’Arbazal, ún de los pueblos más altos del conceyu maliayés. El pueblu ye pequeñu y antiguu allugáu na ruta a Compostela. Un enclave medieval que cuenta con una capillina prerrománica dedicada a Sanzornín, el templu de Santa María construíu nel XVII, l’antiguu Mesón de Pelegrinos perteneciente al Conventu de Valdediós, una casa con reló de sol casi tan antiguu como’l pueblu...
Esti día los estrenchos y emprunaos caminos d’accesu al pueblu alcontrábense tomaos polos coches de xente qu’asistía al actu nel que se despidía a Antonio Lozano. Fue un actu mui especial y sentíu, nel que se quixo da-y el mayor adiós al gaiteru de Vallinaoscura. Tuvo presente la familia, un bisnietu, Fabián, dio llectura a unes palabres, la última voluntá d’Antonio, que pidía que la so muerte nun fuese motivu de tristeza, sinon tolo contrario, de celebración.
Antonio, cuando se xuntaba xente al so redor a cantar, a tocar, a tomar sidra, sintíase feliz; él llamaba a aquelles folixes en bona compaña “ceremonies”. La d’Arbazal fue una verdadera “ceremonia” ente familiares y amigos, ente músicos... Gaiteros sareganos de la Banda Llariegu interpretaren varies pieces nel so recuerdu.

Besos prohibíos

Agora que los besos tán proscritos pol Ministeriu de Sanidá a cuenta de la nueva gripe -a toa enfermedá-y correspuende una prohibición y una censura moral-, l’ósculu conviértese, como toa transgresión, n’elementu d’interés creciente, artículu de luxu, y material de confección artística. En realidá, la obra dramática “Besos” qu’acaba d’estrenar nel Teatru Riera de Villaviciosa la compañía Contraste, lleva yá una década rodando pelos escenarios españoles ente reconocimientos de crítica y públicu, pero nesti momentu históricu adquier una nueva dimensión.
Trátase del primer ésitu importante d’un dramaturgu valencianu, Carles Alberola (Alcira, 1964), que ye al empar actor, fundador del grupu Albena Teatre, y personaxe venceyao al mediu televisivo. Carles escomenzó a escribir teatru nos años 90, y entregó’l so últimu llibretu, “13” en 2006. La obra “Besos” ye una pieza realizada a dos manes, en collaboración con Roberto García.
Besu, beisu, beso, baiser, beijo, muxu, kiss, kus, kub... Cada idioma tien la so forma y el so mou de llamalu. La palabra nos nuestros idiomes románicos posee curiosamente una raíz céltica, y como toles palabres antigües y apasionaes, dispón de varios y contradictorios significaos. Según el diccionariu de la RAE, besu ye tantu acción cariñosa como “golpe violentu que se dan dos persones na cara o la cabeza”. Na llingua de Balzac, besar significa también engañar –por aquello de Xudes, de xuro- y amorecer.
De too esto y muncho más trata la obra qu’acaba d’estrenar con ésitu de públicu –les entraes duraron 15 minutos na puerta del colexu, ¡quiero dicir de la taquilla!- y crítica’l grupu Contraste, dirixíu nesta ocasión –eficazmente, a dicir del resultáu- por Laura Iglesias, ún de los pilares d’Higiénico Papel. La lletra contién música, y los actores pasión. Desde principiu a fin l’acción nun escayez, asela cola mutación de colores y acelérase colos decibelios de la música.
Nesta vida hai siempre una melodía pa cada situación, y una situación pa cada melodía. La música relaxa o enraxona, según el momentu y el nivel al qu’hebia llegao la infidelidá na escala de richter. L’humor tolo peñera, y la gran interpretación fai que mereza la pena acercase al teatru, inclusu anque habia que pagar -o pegar- por entrar.

Morrió'l llagareru maliayu Manuel Peruyera, Manolo'l de Coru

Ayer morrió'l llagareru maliayu Manuel Peruyera Peón. Manolo'l de Coru ñació en La Venta Coru en 1926. Yera un llagareru de los d’antes, fíu de llagareru, bebedor -nunca lo dexó pesie a les recomendaciones del médicu-, gran entendíu... Tenía un humor irónicu mui asturianu. La suya fue una vida entera ente toneles. Dexa viuda y dos fíos. So pá, Ceferino Peruyera, abrió’l llagar de Coru a la vuelta d’América. Corría l’añu 1914, el de la Gran Guerra europea, pero’l negociu diría, pali que pali, a más. Manolo crióse ente mayos, verines y bombes de tresegar a mano (como la que sal nel semeyu, de los años 40, nel que sal Manolo dándo-y al rabil de la bomba de tresegar). Nun había munches posibilidaes d’estudiar daquella: “daba clases con Agustín Zamorano en La Quinta”, les cuatro regles mayormente. En realidá, “la sidra ye la mi vida desde piquiñín, la única carrera qu’estudié”, reconocía nuna entrevista que-y fixi fai unos meses y que figura ente los post antiguos d'esti blog.
El vieyu llagar de Coru llegó a aprosimáse a les mil pipes de sidra mayaes na época de mayor producción. Vendín sidra en Xixón, Uviéu... Abastecín a Casa Portal en Madrid, cuando dir a la capital yera una aventura exótica. Manolo medró nesti mundu a la sombra del padre. En 1960 llegó`l momentu de baxar a La Villa, y construyó la primera nave. Col tiempu formarín un gran llagar na carretera de Fuentes, de la que s'ocupaba yá mayormente nos últimos años el so fíu, Manolo. Morrió de repente, cuando se subía al coche pa dir al hospital de Cagüeñes a una revisión ordinaria. Antes cargó nel maleteru una caxa sidra pa lleva-y médicu. Entiérrase ésta tardi. El nuestru pésame a la familia.

Una Casa-Muséu pal artista Rubio Camín en Valdediós

La muerte de Joaquín Rubio Camín (Xixón 1929-2007) privó a Asturies d’un gran creador, d’un gran artista integral y con una sensibilidá especial. Fai dos años que desapareció físicamente, pero la importante obra que formó en vida nun s’esmució con él. La familia tien l’enfotu de que la casa na que viviera desde 1975, na parroquia maliayesa de Pueyes, se convierta nuna Casa-Muséu del autor... Veremos si la iniciativa prospera.
El proyectu tien varios vientos en contra: la falta d’una sinceru interés hacia la creación artística, a nun ser que se trate d’un productu procedente de Berlín o Nueva York; la incompresión hacia aquelles propuestes estétiques que tienen en cuenta la biodiversidá que nos arrodia, que nos envuelve y identifica anque nun l’apreciemos; l’apueste de los poderes públicos poles llamaes factoríes culturales –Niemeyer, Llaboral, Muséu de la Prehistoria...- que reducen la cultura a hormigón y ufierta turística.
La política confunde cultura con infraestructura. Nesti comienzu de centuria, los pintores y escultores son menos importantes que los arquitectos. Calatrava o Foster lleven camín d’eclipsar a Camín. ¿Camín? ¿Quién ye Camín? Igual da que nos refiramos a Alfonso Camín qu’a Rubio Camín, igual da que digamos pintura que poesía, Porceyu que Valdediós. Asturies ye inxusta colos suyos, anque los suyos seyan pegoyos fundamentales de la cultura asturiana, y proyección de la so vocación universal.
L’arte convirtióse nuna mercancía nesta Asturies iconoclasta y gamberra, que prefier ser fotocopia de cualquier cosa llegada de fuera que correa tresmisora d’una realidá propia, definida, identificable... Nuestra. El nuestru artista pintó, esculpió, escribió... Amó munches coses: ehí tenemos la recopilación qu’acaba facer Cubera, una riestra d’articulinos ilustraos con plumilles propies que presta ver xuntes, como muestres de la so ferviente almiración por ésti mundu que-y da la espalda.