Una güeyada a Villaviciosa

Ilesia fortaleza de Sietes

Humberto Alonso esmaraviya, nel cénit de la so carrera, presentando un magníficu llibru de 140 rincones maliayos 

L'asociación Cubera acaba de publicar un estupendu llibru con dibuxos del pintor colungués -maliayés d'adopción- Humberto Alonso. La obra titúlase "Villaviciosa, una mirada" y tien cásique un cientu de páxines a color maraviyosamente decoraes pol pintor; Alonso ye consideráu, a los sos ochenta y tantos años, el meyor acuarelista del Principáu. La llamativa obra ye una exaltación de los valores maliayos: naturaleza, fuentes, ilesies, palacios, horros, facines, capiyes d'ánimes..., acompañaos de siete collaboraciones d'otros tantos escritores con una reseña suya al final: "L'iconu unánime" de Mino Cifuentes Tuero; "El sentimiento del paisaje" de José Manuel Valdés Costales; "Tierra de paso, paso de siglos" d'Ángel Valle Cuesta; "El estilo Villaviciosa", de Xuan Pedrayes Obaya; "Una visita del Olimpo" d'Etelvino González López; "Toponimia, el nome de los topos" de Lluis Portal Hevia; "Paisaje nuestro" de Salvador Barro Pérez, nel que se da conteníu al gran retu de esplicar, reflesivamente, la realidá maliaya del sieglu XXI. Mino Cifuentes asegura sobre la realidá rural -qu'ocupa más del ochenta por cientu del llibru, esti ye un conceyu rural- que "Nes aldees y quintanes, un obxetu unánime destaca ente los demás: l'horru", que sería esi iconu, qu'él relacina coles civilizaciones asiátiques y los templos griegos. José Ortega y Gasset acusbió nél lo sagrao: "El hórreo, menudo templo, tosco, arcaico, de una religión muy vieja, de todo el dios que asegura las cosechas". El tonu de Mino ye optimista a pesar de la situación de los dosmil y picu horros y paneres qu'esisten -dalgunos sobreviven- na aldea villaviciosina: "L'aldea maliaya y astur tien que remanencer nun nuevu habitat y ellí tara l'horru". Etelvino recurre a les deidaes helenes, a los que sitúa na actualidá, y a los dioses de la ría pa esplicar l'orixe de les coses. Parez qu'acepta la idea de Maliayo, relacionáu coles abundantes montañes que la escolten, d'orixe griegu, vinculandolu colos numerosos topónimos cretenses actuales como Malia. Pela so parte, Ángel Valle calcula que fai 100.000 años circulaben per equí los primeros maliayos conocíos; posteriormente los llugones arganticenos fueren -munchu dempués nel tiempu, pero non menos importantes- los primeros identificaos na ilesia de Grases; llueu vieno Valdediós, nun dir y venir que tovía nun terminó, tuvieron poder y espansión; y posteriormente l'acebache fizo que la xente de Les Mariñes se movieria lloñe de la tierra de nación. Porque la idea de salir yera una necesidá vital de los maliayeses, fuera equí cerca o a América: Cuba y Arxentina, principalmente. Pero esti movimientu nun s'entiende sin el desarrollu de les carreteres y autovíes que fueron sustituyendo a les carreterines y los barcos de cabotaxe. Los dibuxos d'Humberto, 140 en total, van acompañando les collaboraciones gracies al bon facer d'Etelvino González y Ángel Valle. La totalidá de les obres son situaciones reales tomaes la mayor parte nos últimos meses del natural; solamente una muyer con una macona y una vendedora de madreñes, feches a plumilla, son espresiones d'otra dómina, así como un paragueru en plena faena, xunto con un carreteru con una parexa de gües y un carru de los d'esquirpia antiguos. Destaquen, pola so calidá, el palaciu de Buznéu, en Pión, la casa solariega de la familia Xove-Llanos; el palaciu de L'Agüera, en Priesca; el palaciu de L'Anciena, xunto a la ría; la gran casa de Sorribes colos sos güeyos puestos na Villa a la que ve dende'l cuetu del mesmu nome y la carbayera; la torre de Villanueva, construida nel sieglu XV; el palaciu de La Torre, en Niévares, rodeáu de vestustes muralles; el palaciu de Pandu o de doña Carlota, en Tornón, que mira confiáu la ría; la villa de Les Bargañes, n'Amandi, más reciente pero tamién llamativa. La Villa tien casones y palacios pero si daqué destaca nes páxines del llibru ye la espectacularidá del Ayuntamientu y la suntuosa escalera de mármol fecha a plumilla, como los balcones de les cases antigües de les travesíes de la cai del Agua, con aguada. Finalmente resulta perinteresante l'enfoque de Tazones, dende'l so suroeste, qu'aporta'l pintor una vista diferente del puertu pesqueru mirando a la mar, que resulta mui estremada de los cuadros y semeyes que circulen del puertu fechu dende'l muelle. (LNE, La Nueva Quintana, 15.1.2013)

'Tuxa', arrasa en dos certames teatrales

El montaxe de 'Tuxa' acaba de consiguir varios premios nel XIV Cetame de Teatru d'A Veiga. El grupu de teatru maliayés Contraste, en collaboración col grupu de Carbayín, compitieron con otros nueve grupos seleccionaos d'Asturies. A la fin ficiéronse colos siguientes premios:
-PREMIU AL MEYOR GRUPU DEL CERTAME.
-PREMIU A LA MEJOR ACTRIZ PRINCIPAL A AIDA CASTAÑON pol personaxe de Tuxa.
-PREMIU AL MEYOR ACTOR DE REPARTU A JOSÉ RAMON OLIVA pol so personaxe de Tíu.
-PREMIU A LA MEYOR DIRECCIÓN A JOSÉ LUIS CAMPA.
Apocayá, na Muestra Ciudá d'Uviéu tamién-yos concedieron:
-PREMIU A LA MEYOR ACTRIZ PRINCIPAL A AIDA CASTAÑÓN.
-PREMIU A LA MEYOR ADAPTACIÓN Y TEXTU N'ASTURIANU, que realizaron los maliayeses Miguel González Pereda, Etelvino González López y Lluis Portal.
Norabuena a tolos que participaren nesti entamu, que supón rescatar del escaecimientu a una lliterata maliayesa, Teresa Villaverde Villaverde, una interesante escritora bablista y más interesante personaxe, fallecíu en 1934 nun tráxicu accidente.

Prestosa presentación de 'Pelegrinos del abismu' en Blimea

El pasáu xueves día 5 presentóse na Casona del Bravial de Blimea, sé de la Oficina de Normalización Llingüística del conceyu de Samartín del Rei Aurelio, el llibru 'Pelegrinos del abismu'. L'actu tuvo llugar ante un públicu xuvenil de primero a cuarto de la ESO del institutu Juan José Calvo Miguel de Sotrondio. Yera un actu organizáu por Hugo Cortina, responsable de la oficina, que fue presentáu pol tamién escritor Xosé Ramón Ardines. Cerca de trenta alumnos d'asturiano, que lleeran previamente'l testu, tuvieron la oportunidá de facer entrugues sobre esta novelina xuvenil, publicada l'añu pasáu pela ALLA -que la premió en 2009-. L'actu, organizáu nel marcu de la Selmana de les Lletres Asturianes, resultó mui prestosu y animáu.

La llibrería de Calixto

Na Plaza del Generalísimo de Villaviciosa, tamién llamada del Güevu, había daquella –a comienzos de los ochenta- un sitiu de venta de periódicos conocíu por Casa Calixto, onde’l paisano que despachaba –un daqué foín y malencaráu- anque se llamaba Luis respondía pol nome del suegru, fundador del negociu. Tratábase d’un local de madera perantiguu y foroñosu, cuyes parés permanecín enllenes de carteles de cuando Manolete o más p’atrás y dalgún retratu de la dictadura, y el suelu aparecía estráu de periódicos vieyos de cuando les últimes –yeren frecuentes entós en La Villa- inundaciones.
Mayormente vendía periódicos: tolos asturianos menos Región, que tenín n’esclusiva na Imprenta Vallín del Ancho. También dellos diarios de Madrid, destacando poles ventes l’Abc. Ufiertaba Calixto tamién noveles del oeste y dalgunes revistes non demasiao porconzones, magar que recuerdo una portada escolforiada de Raquel Welch que tuvo más salida aquellos díes que’l timoratu diariu monárquicu. Completaba’l xéneru a la venta dalgún llibru –escasu eso sí, nun fuera haber protestes de los prohomes locales; daquella un llibru tovía resultaba sospechosu, fuese’l que fuese’l so conteníu.
El casu ye qu’aquel domingu, cuando fui a buscar puntualmente el mio Diario 16, rellumaba nun de los estantes con puerte de cristal un llibru raru, perraru. “Calixto, ¿qué llibru ye esi?”, entrugué, y Calixto, osea Luis, mirándome de revisgu, con aquelles gafes de montura gruesa esboligando pela pendiente de la ñariz abaxo, camín del abismu, y encoyéndose d’hombros, gorgutó: “¡Dejárenlu ahí!”.
Tratábase del Garrapiellu lliterariu asturianu, un volume de poemes y cuentos d’un tal Mánfer de la Llera. Munchu tiempu dempués enteréme que’l propiu autor s’encargara d’editalu en 1983 y distribuílu per unes cuantes llibreríes o puestos de periódicos, lo que cuadrase -en Villaviciosa nunca proliferaron les primeres-. Destacaba nel volume la temática minera. Preferí la narración a la poesía. Llamóme l’atención la bayura del vocabulariu, un daqué exóticu pero fondamente cercanu, la prosa palpitante, viva, reivindicativa y normalizadora. Fue’l mio primer llibru n’asturianu y nunca m’escaeceré d’él, nin del so autor. Sirvan estes lletres de modestu homenaxe a la so figura nesti Día de les Lletres. (Voz de Asturias 6/5/2011)

Los cabraneses de L’Habana (2)

La guerra cubana diezmó a los asturianos y les propiedaes que tenín na isla, hasta llevar a munchos d’ellos a la ruina. Según el censu del gobiernu d’ocupación americanu de 1899, los españoles de nacimientu yeren entós 129.236 (la población total sumaba 1’5 millones d’hab.) Suponíase que se reduciría la cifra cuando Cuba caminase sola, pero ello nun fue así: nes décades siguientes docenes de miles de peninsulares embarcaron rumbu a la isla caribeña buscando fortuna.
En 1919 un emigrante llegáu a Cuba desde Santolaya de Cabranes faríalo mayormente nun barcu español como los de la compañía Herrera. Desembarcaría nun muelle propiedá d’una empresa española. Si s’acercaba a cualquiera de les ilesies de L’Habana Vieja a dar gracies a San Francisco por llegar al destín sanu y salvu, podía acudir, sin movese del puertu, al conventu de San Francisco, a la ilesia de Paula –bastida en parte pola empresa del tranvía-; tamién tenía cerque la señorial de La Mercé –de bóvedes bayurosamente policromaes-, a la de San Francisco d’Asís…; ye mui probable que l’oficiante fuere un de los 426 cures peninsulares qu’exercín en Cuba. Si quería comprar daqué, podría ser atendíu por un de los 28.292 españoles que trabayaben nel ramu del comerciu –normalmente asturianos y gallegos-. Si llegaba con fame, podía acudir a un bar o restaurante, cuyu propietariu mui seguramente yera de la mesma nacionalidá.
Si comía sentáu, ye probable que la mesa y la tayuela fueran ellaboraes por firmes como Gancedo y Crespo, cuya procedencia nun fai falta esplicar. Si garraba una xarré pa treslladase, yera fácil que lu llevara un de los 3.313 españoles qu’exercín l’oficiu de cocheru. Si un día xuntaba unos pesos y mercaba un gochín pa invitar a los amigos a un asáu, lo más probable ye qu’acudiera a un de los 59.403 españoles que nesi añu figuren como agricultores na isla. Si tomaba un vinu, sería de xuru procedente de la Rioja. Si pidía una cerveza sería de La Polar o La Tropical, dambes marques fundaes por españoles en Puentes Grandes. Si-y pruyía la señaldá y necesitaba meter sidre en vena, podía acudir a dalguna tabierna céntrica d’asturianos, pongamos la de Manín, n’Obrapía, onde se vendía sidre de Villaviciosa del tonel, o embotellao: Cima, El Gaiteru....
Si-y petaba lleer un periódicu, bien podía ser el del maliayés Nicolás Rivero, el Diario de la Marina, el de mayor tirada y difusión per aquelles tierres. Mientres lu lleía, el cabranés podía fumar un puru, pongamos un Flor de Cano, fabricáu pol español J. Cano. Si quería dir a una fiesta selecta, podía escoyer ente docenes de sociedaes asturianes y españoles asitiaes nel Malecón, el céntricu Prado o Parque Central, pero tamién nel señorial Vedado, n’El Cerro, Marianao… Eso solo en L’Habana. En cada pueblu de la isla, por pequeñu que fuere, l’emigrante de Santolaya atoparía –atopó- l’apoyu y la solidaridá d’un hospital asturianu o un casinu español.

Los cabraneses de L'Habana (I)

Julio González Tirador, pesie a tener raíces riosellanes, ye l’actual presidente de la Unión Cabranense de L’Habana. Sustituyó al recordáu Mario Gª Granja, que tornó a casa después de mediu siglu. L’asociación agrupa a los naturales de Caravia, Villaviciosa y Cabranes, siendo’l más ilustre de los sos miembros el caraviense Constantino Díaz Luces, verdaderu ‘discu duru’ de la memoria asturiana de Cuba.
Tirador ye un home hiperactivu y amable, con fondes raíces nesta tierra. So güelu formaba parte de la colonia hispana de Bejucal durante la guerra cubana y como tal lu trataron los ‘mambises’ cuando, a causa de la gran resistencia que mantenín los peninsulares naquella plaza, quemáron-y toles propiedaes por orden del ‘padre de la independencia’ Máximo Gómez.
Ya queden pocos asturianos y menos cabraniegos na capital, dientro de la Unión Cabranense malpenes 9, pero la sociedá goza de bona salú yá que cuenta con más de quinientos socios, que participen habitualmente nes sos actividaes, especialmente les comides de fin de añu y la de la Santina; una fecha señala –como nun podía ser d’otra manera- pa tolos asturianos, qu’organicen una misa nel hogar Santovenia, una comida… Santovenia ye una de les quintes que construyeron los emigrantes nel barriu d’El Cerro, zona residencial y d’espansión de L’Habana, onde s’afayaba igualmente –ellí siguen- la Quinta Covadonga, el Centru de Dependientes del Comerciu...
La procesión de La Santina pel Cerro yera antiguamente multitudinaria. La xente echaba flores y rames al so pasu y participaba nuna gran xira, que más parecía una romería de cualquier puebu asturianu. El Cerro ye pa los asturianos un símbolu del pasáu esplendorosu que, quiciás dalgún día, retorne.
Tirador comentanos la celebración esti añu del centenariu de la Unión Cabranense, al que-yos gustaría qu’asistiera l’alcalde de Cabranes: “Ya sabemos qu’anda mui ocupáu, pero si usté pue dicí-y algo…”. Llamóse primero Club Cabranense, pero en 1917 hubo una división interna qu’allumbró a los Hijos de Cabranes, que finalmente se xuntaron na sociedá actual.
(Semeyu antiguu Centru Asturianu de L'Habana. En primer términu Monumentu a Martí)

Morrió Tano Collada

Morrió esti día Tano Collada. Amás de ser el padre, tíu, güelu, suegru… de varios amigos, yera una persona conocida en La Villa y verdaderu patriarca d’una familia grande y apreciada. Tano siempre me pareció un paisano de los d’antes, pero sin les zunes de los de antes, un home educáu, seriu na acepción más seria de la palabra; abiertu y amable.
Los que lu conocín bien nunca-y escucharon una palabra más alta o más áspera qu’otra, sacando situaciones puntuales en que la situación requería alzar la voz. Yera un paisano con convicciones al que-y tocó vivir momentos difíciles. Pertenecía a una familia de L’Algara (Amandi), y contribuyó a formar otra más grande en Llavanderu (Fuentes), nuna casa abierta a tou’l mundu. Recordaba esti día Angelina qu’en 65 años de vivir xuntos pasaron un poco de tou, anque primaron siempre l’optimismu y les satisfaiciones.
Nació cuando terminaba la I Guerra Muncial y en París decidíase que nunca más volvería haber una guerra, pero tal declaración quedó pronto pa prau, pues la guerra marcó’l s. XX, especialmente dura a esti llau del mundu fue la guerra civil y la terrible posguerra. Esa esperiencia marcó tamién a Tano, que yera una persona con conciencia, y supo tresmití-yos la so forma de ver el mundo a los fíos.
Tano mantuvo intactes hasta l’últimu momentu les sos facultaes, y sobre tou la cordura. Lo importante nun ye llegar a vieyu, inclusu llegar a ser mui vieyu resulta relativamente fácil nesta época d’avances nel campu de la salú, sinon ser tu, saber siempre quién yes, conocer a los que t’arrodien, disfrutar de la vida hasta’l final como fizo él.
Conocí a una muyer na residencia a la que siempre-y gustó cantar asturiano, pero la vieyera mermó-y les facultaes d’antañu, y así, cuando-y piden que cante algo, suel contestar: “pa cantar hai que tar acordies”. Pa cantar y pa vivir, suscribiríalo Tano, hai que tar acordies.