DEGOLANDO

Compromisu denuncia la segunda ‘incautación’ de la Fabrica El Gaitero

2011-05-21T12:22:00.000-07:00

El 29 de septiembre de 1936 el Sindicato Único del Champán, adscrito a la CNT, incautó la fábrica de sidra El Gaitero de Villaviciosa, llevándola en los meses siguientes a la ruina. En estos momento, una mala –y peor aplicada- Ley de Costas, amenaza con ‘incautar’ de nuevo la factoría sita en La Espuncia, medida que augura una ‘llaceria’ similar. Desde la candidatura Compromisu por Villaviciosa (CV) queremos reiterar nuestra más firme condena de los planes del Ministerio de Medio Ambiente y Recursos Naturales (MARN), en relación con el deslinde de la costa asturiana, que causan un gravísimo perjuicio a los ribereños de la ría que poseen edificaciones o ‘porreos’ en su entorno, siendo especialmente sangrante el caso de El Gaitero, por ser una empresa con más de 120 años de historia, que da puestos de trabajo –en concreto, 70-, y riqueza al concejo y a Asturias. (Nota publicada nel periódicu Oriente Express el llunes 16 de mayu de 2011)

'Tuxa', arrasa en dos certames teatrales

2011-05-21T12:03:00.000-07:00

El montaxe de 'Tuxa' acaba de consiguir varios premios nel XIV Cetame de Teatru d'A Veiga. El grupu de teatru maliayés Contraste, en collaboración col grupu de Carbayín, compitieron con otros nueve grupos seleccionaos d'Asturies. A la fin ficiéronse colos siguientes premios:
-PREMIU AL MEYOR GRUPU DEL CERTAME.
-PREMIU A LA MEJOR ACTRIZ PRINCIPAL A AIDA CASTAÑON pol personaxe de Tuxa.
-PREMIU AL MEYOR ACTOR DE REPARTU A JOSÉ RAMON OLIVA pol so personaxe de Tíu.
-PREMIU A LA MEYOR DIRECCIÓN A JOSÉ LUIS CAMPA.
Apocayá, na Muestra Ciudá d'Uviéu tamién-yos concedieron:
-PREMIU A LA MEYOR ACTRIZ PRINCIPAL A AIDA CASTAÑÓN.
-PREMIU A LA MEYOR ADAPTACIÓN Y TEXTU N'ASTURIANU, que realizaron los maliayeses Miguel González Pereda, Etelvino González López y Lluis Portal.
Norabuena a tolos que participaren nesti entamu, que supón rescatar del escaecimientu a una lliterata maliayesa, Teresa Villaverde Villaverde, una interesante escritora bablista y más interesante personaxe, fallecíu en 1934 nun tráxicu accidente.

Compromisu por Villaviciosa

2011-05-10T15:11:00.000-07:00

Los políticos son el principal problema del país, según los sondeos de opinión, por delante del paro y el terrorismo. Algo insólito en treinta y tantos años de democracia. Sin embargo, ellos no parecen acusar recibo de la situación, que es ya una hiedra voraz que les trepa por la pernera. Al contrario, se distraen en contenciosos internos, mayormente personales, eludiendo los graves problemas de los ciudadanos. Eso explica la inflación de siglas en el mercado local, lo cual no significa que haya más gente pensante al acecho de los problemas vecinales. Creo que Villaviciosa merece ser algo más que el eco lejano y ajeno de los duelos de sable regionales.
Para alguien que observe de forma serena la vida municipal, no parecen existir muchos motivos de peso para acudir a votar el próximo 22 de mayo. Sin embargo, soy de los que creen que democracia y elecciones son caras de una misma moneda, y que el propio acto de acercarse a un colegio electoral es un ejercicio de libertad que hace justicia a tantas generaciones privadas de tal derecho en el pasado.
No seguí al detalle la actividad municipal, pero considero pertienente separar la ‘ponxa’ del ‘granu’ de algunas cuestiones de interés de la legislatura. Por ejemplo, en la esfera del Urbanismo había un plan para regalar gran cantidad de terrenos comunales –sustraídos en su día a los legítimos dueños, los vecinos de Seloriu- a los Masaveu -la familia más rica de Asturias-. Los mismos tenían como destino la creación de una urbanización de lujo, que se iba a levantar en pleno boom especulativo y bajo sospecha de ‘pelotazo’. En Lliñeru se daba daba pie a otra operación similar a favor de un conocido terrateniente; en Les Mariñes… El nuevo PGOU se redactó con gran transparecia en un proceso en el que participaron una cantidad insólita de asociaciones, profesionales y vecinos. En La Rasa, pese a los tortuosos burocratismos, se aprobó finalmente un polígono de 73 hs, el mayor del centro-oriente, en el que ya hay varias empresas importantes dispuestas a instalarse, pese a la crisis, y a crear puestos de trabajo, y para mí este hecho representa por sí solo un ejemplo de racionalidad y pragmatismo desacostumbrado en la política local, pero sobre todo supone un antídoto contra tentaciones perniciosas. Su gestor, es justo decirlo, fue el concejal Rogelio Estrada.
La biblioteca se había recluído en ‘Siberia’, y allí sigue, pero ante tal arbitrariedad culturicida hubo posturas claudicantes, otras contemporizadoras, y alguna, como la del citado edil, que nunca bajaron el volumen de su denuncia en medio de la más soporífera indiferencia. Por estas razones, creo que es un acierto que Rogelio se presente a estos comicios. Seguramente no es el edil modélico del que habla ‘Adeflor’ en su obra ‘El Concejal’, pero creo que su Compromisu por Villaviciosa, por la recuperación del ‘acebache’, por la biblioteca, por el urbanismo limpio y equilibrado, por la ría, por la replantación de Cubera, por el impulso económico y la reestructuración administrativa municipal merecen ser tenidas en cuenta. ('La semeya', artículu publicáu nel periódicu El Fielato'l día 4/5/2011)

Prestosa presentación de 'Pelegrinos del abismu' en Blimea

2011-05-08T15:15:00.000-07:00

El pasáu xueves día 5 presentóse na Casona del Bravial de Blimea, sé de la Oficina de Normalización Llingüística del conceyu de Samartín del Rei Aurelio, el llibru 'Pelegrinos del abismu'. L'actu tuvo llugar ante un públicu xuvenil de primero a cuarto de la ESO del institutu Juan José Calvo Miguel de Sotrondio. Yera un actu organizáu por Hugo Cortina, responsable de la oficina, que fue presentáu pol tamién escritor Xosé Ramón Ardines. Cerca de trenta alumnos d'asturiano, que lleeran previamente'l testu, tuvieron la oportunidá de facer entrugues sobre esta novelina xuvenil, publicada l'añu pasáu pela ALLA -que la premió en 2009-. L'actu, organizáu nel marcu de la Selmana de les Lletres Asturianes, resultó mui prestosu y animáu.

La llibrería de Calixto

2011-05-08T09:19:00.000-07:00

Na Plaza del Generalísimo de Villaviciosa, tamién llamada del Güevu, había daquella –a comienzos de los ochenta- un sitiu de venta de periódicos conocíu por Casa Calixto, onde’l paisano que despachaba –un daqué foín y malencaráu- anque se llamaba Luis respondía pol nome del suegru, fundador del negociu. Tratábase d’un local de madera perantiguu y foroñosu, cuyes parés permanecín enllenes de carteles de cuando Manolete o más p’atrás y dalgún retratu de la dictadura, y el suelu aparecía estráu de periódicos vieyos de cuando les últimes –yeren frecuentes entós en La Villa- inundaciones.
Mayormente vendía periódicos: tolos asturianos menos Región, que tenín n’esclusiva na Imprenta Vallín del Ancho. También dellos diarios de Madrid, destacando poles ventes l’Abc. Ufiertaba Calixto tamién noveles del oeste y dalgunes revistes non demasiao porconzones, magar que recuerdo una portada escolforiada de Raquel Welch que tuvo más salida aquellos díes que’l timoratu diariu monárquicu. Completaba’l xéneru a la venta dalgún llibru –escasu eso sí, nun fuera haber protestes de los prohomes locales; daquella un llibru tovía resultaba sospechosu, fuese’l que fuese’l so conteníu.
El casu ye qu’aquel domingu, cuando fui a buscar puntualmente el mio Diario 16, rellumaba nun de los estantes con puerte de cristal un llibru raru, perraru. “Calixto, ¿qué llibru ye esi?”, entrugué, y Calixto, osea Luis, mirándome de revisgu, con aquelles gafes de montura gruesa esboligando pela pendiente de la ñariz abaxo, camín del abismu, y encoyéndose d’hombros, gorgutó: “¡Dejárenlu ahí!”.
Tratábase del Garrapiellu lliterariu asturianu, un volume de poemes y cuentos d’un tal Mánfer de la Llera. Munchu tiempu dempués enteréme que’l propiu autor s’encargara d’editalu en 1983 y distribuílu per unes cuantes llibreríes o puestos de periódicos, lo que cuadrase -en Villaviciosa nunca proliferaron les primeres-. Destacaba nel volume la temática minera. Preferí la narración a la poesía. Llamóme l’atención la bayura del vocabulariu, un daqué exóticu pero fondamente cercanu, la prosa palpitante, viva, reivindicativa y normalizadora. Fue’l mio primer llibru n’asturianu y nunca m’escaeceré d’él, nin del so autor. Sirvan estes lletres de modestu homenaxe a la so figura nesti Día de les Lletres. (Voz de Asturias 6/5/2011)

Los cabraneses de L’Habana (2)

2011-05-08T05:11:00.000-07:00

La guerra cubana diezmó a los asturianos y les propiedaes que tenín na isla, hasta llevar a munchos d’ellos a la ruina. Según el censu del gobiernu d’ocupación americanu de 1899, los españoles de nacimientu yeren entós 129.236 (la población total sumaba 1’5 millones d’hab.) Suponíase que se reduciría la cifra cuando Cuba caminase sola, pero ello nun fue así: nes décades siguientes docenes de miles de peninsulares embarcaron rumbu a la isla caribeña buscando fortuna.
En 1919 un emigrante llegáu a Cuba desde Santolaya de Cabranes faríalo mayormente nun barcu español como los de la compañía Herrera. Desembarcaría nun muelle propiedá d’una empresa española. Si s’acercaba a cualquiera de les ilesies de L’Habana Vieja a dar gracies a San Francisco por llegar al destín sanu y salvu, podía acudir, sin movese del puertu, al conventu de San Francisco, a la ilesia de Paula –bastida en parte pola empresa del tranvía-; tamién tenía cerque la señorial de La Mercé –de bóvedes bayurosamente policromaes-, a la de San Francisco d’Asís…; ye mui probable que l’oficiante fuere un de los 426 cures peninsulares qu’exercín en Cuba. Si quería comprar daqué, podría ser atendíu por un de los 28.292 españoles que trabayaben nel ramu del comerciu –normalmente asturianos y gallegos-. Si llegaba con fame, podía acudir a un bar o restaurante, cuyu propietariu mui seguramente yera de la mesma nacionalidá.
Si comía sentáu, ye probable que la mesa y la tayuela fueran ellaboraes por firmes como Gancedo y Crespo, cuya procedencia nun fai falta esplicar. Si garraba una xarré pa treslladase, yera fácil que lu llevara un de los 3.313 españoles qu’exercín l’oficiu de cocheru. Si un día xuntaba unos pesos y mercaba un gochín pa invitar a los amigos a un asáu, lo más probable ye qu’acudiera a un de los 59.403 españoles que nesi añu figuren como agricultores na isla. Si tomaba un vinu, sería de xuru procedente de la Rioja. Si pidía una cerveza sería de La Polar o La Tropical, dambes marques fundaes por españoles en Puentes Grandes. Si-y pruyía la señaldá y necesitaba meter sidre en vena, podía acudir a dalguna tabierna céntrica d’asturianos, pongamos la de Manín, n’Obrapía, onde se vendía sidre de Villaviciosa del tonel, o embotellao: Cima, El Gaiteru....
Si-y petaba lleer un periódicu, bien podía ser el del maliayés Nicolás Rivero, el Diario de la Marina, el de mayor tirada y difusión per aquelles tierres. Mientres lu lleía, el cabranés podía fumar un puru, pongamos un Flor de Cano, fabricáu pol español J. Cano. Si quería dir a una fiesta selecta, podía escoyer ente docenes de sociedaes asturianes y españoles asitiaes nel Malecón, el céntricu Prado o Parque Central, pero tamién nel señorial Vedado, n’El Cerro, Marianao… Eso solo en L’Habana. En cada pueblu de la isla, por pequeñu que fuere, l’emigrante de Santolaya atoparía –atopó- l’apoyu y la solidaridá d’un hospital asturianu o un casinu español.

Los cabraneses de L'Habana (I)

2011-02-25T09:23:00.001-08:00

Julio González Tirador, pesie a tener raíces riosellanes, ye l’actual presidente de la Unión Cabranense de L’Habana. Sustituyó al recordáu Mario Gª Granja, que tornó a casa después de mediu siglu. L’asociación agrupa a los naturales de Caravia, Villaviciosa y Cabranes, siendo’l más ilustre de los sos miembros el caraviense Constantino Díaz Luces, verdaderu ‘discu duru’ de la memoria asturiana de Cuba.
Tirador ye un home hiperactivu y amable, con fondes raíces nesta tierra. So güelu formaba parte de la colonia hispana de Bejucal durante la guerra cubana y como tal lu trataron los ‘mambises’ cuando, a causa de la gran resistencia que mantenín los peninsulares naquella plaza, quemáron-y toles propiedaes por orden del ‘padre de la independencia’ Máximo Gómez.
Ya queden pocos asturianos y menos cabraniegos na capital, dientro de la Unión Cabranense malpenes 9, pero la sociedá goza de bona salú yá que cuenta con más de quinientos socios, que participen habitualmente nes sos actividaes, especialmente les comides de fin de añu y la de la Santina; una fecha señala –como nun podía ser d’otra manera- pa tolos asturianos, qu’organicen una misa nel hogar Santovenia, una comida… Santovenia ye una de les quintes que construyeron los emigrantes nel barriu d’El Cerro, zona residencial y d’espansión de L’Habana, onde s’afayaba igualmente –ellí siguen- la Quinta Covadonga, el Centru de Dependientes del Comerciu...
La procesión de La Santina pel Cerro yera antiguamente multitudinaria. La xente echaba flores y rames al so pasu y participaba nuna gran xira, que más parecía una romería de cualquier puebu asturianu. El Cerro ye pa los asturianos un símbolu del pasáu esplendorosu que, quiciás dalgún día, retorne.
Tirador comentanos la celebración esti añu del centenariu de la Unión Cabranense, al que-yos gustaría qu’asistiera l’alcalde de Cabranes: “Ya sabemos qu’anda mui ocupáu, pero si usté pue dicí-y algo…”. Llamóse primero Club Cabranense, pero en 1917 hubo una división interna qu’allumbró a los Hijos de Cabranes, que finalmente se xuntaron na sociedá actual.
(Semeyu antiguu Centru Asturianu de L'Habana. En primer términu Monumentu a Martí)

Morrió Tano Collada

2010-07-22T12:23:00.000-07:00

Morrió esti día Tano Collada. Amás de ser el padre, tíu, güelu, suegru… de varios amigos, yera una persona conocida en La Villa y verdaderu patriarca d’una familia grande y apreciada. Tano siempre me pareció un paisano de los d’antes, pero sin les zunes de los de antes, un home educáu, seriu na acepción más seria de la palabra; abiertu y amable.
Los que lu conocín bien nunca-y escucharon una palabra más alta o más áspera qu’otra, sacando situaciones puntuales en que la situación requería alzar la voz. Yera un paisano con convicciones al que-y tocó vivir momentos difíciles. Pertenecía a una familia de L’Algara (Amandi), y contribuyó a formar otra más grande en Llavanderu (Fuentes), nuna casa abierta a tou’l mundu. Recordaba esti día Angelina qu’en 65 años de vivir xuntos pasaron un poco de tou, anque primaron siempre l’optimismu y les satisfaiciones.
Nació cuando terminaba la I Guerra Muncial y en París decidíase que nunca más volvería haber una guerra, pero tal declaración quedó pronto pa prau, pues la guerra marcó’l s. XX, especialmente dura a esti llau del mundu fue la guerra civil y la terrible posguerra. Esa esperiencia marcó tamién a Tano, que yera una persona con conciencia, y supo tresmití-yos la so forma de ver el mundo a los fíos.
Tano mantuvo intactes hasta l’últimu momentu les sos facultaes, y sobre tou la cordura. Lo importante nun ye llegar a vieyu, inclusu llegar a ser mui vieyu resulta relativamente fácil nesta época d’avances nel campu de la salú, sinon ser tu, saber siempre quién yes, conocer a los que t’arrodien, disfrutar de la vida hasta’l final como fizo él.
Conocí a una muyer na residencia a la que siempre-y gustó cantar asturiano, pero la vieyera mermó-y les facultaes d’antañu, y así, cuando-y piden que cante algo, suel contestar: “pa cantar hai que tar acordies”. Pa cantar y pa vivir, suscribiríalo Tano, hai que tar acordies.

Presentación d' Oh 36! y Poison nel Club de Prensa Asturiana

2010-06-14T18:46:00.000-07:00

Esti miércoles, día 16 de xunu, a les 19 hores. Presentaránse nel Club Prensa Asturiana d'Uviéu les obres de teatru Oh 36! y Poison, de Lluis Portal, qu'acaba de sacar a la lluz la editorial Universos y que recibieron el Premiu Uviéu a la producción dramática. Prestaríanos contar cola vuestra presencia.

La novela prohibida de Palacio Valdés

2010-06-02T00:42:00.000-07:00

Cardenal Segura: “Prohibimos la novela “La fe”, de D. Armando Palacio Valdés, faciendo saber a los fieles qu’incurrirán en pecáu grave los que quebrantaran esta prohibición Nuestra”

El conceyu llavianés acaba de reeditar una novela fundamental del ilustre escritor asturianu Armando Palacio Valdés (Entrialgo, 1853 - Madrid, 1938), “La fe”. La edición, la introducción y les notes débense al incansable estudiosu –espertu na obra d’esti escritor-, Etelvino González López. L’investigador maliayés desentrelliza como nunca antes s’había fecho toles claves de la novela, mui maltratada cuando la so publicación en 1881 y en décades posteriores.
Sorprende, según Etelvino “lo mal lleída y mal interpretada” que fue la polémica obra, reeditada siete veces de forma autónoma y otres cinco en volume recopilatoriu, circunstancia esplicable si se tien en cuenta qu’aborda el conflictu relixosu “de forma complemente nueva”, como apuntaría’l so amigu íntimu Leopoldo Alas. Hai que recordar que, nel “súmmun” de la intolerancia relixosa, la censura denegó la posibilidá d’imprimir la obra en varies ocasiones.
Cita González al ministru d’Información, Gabriel Arias Salgado, que denegó reiteradamente la entrada del testu n’imprenta nel periodu de 1951-1962, aplicando la máxima: “Tola llibertá a la verdad, nenguna al error”, lo que se traduz nuna instrucción contundente: “Tomaránse cuantes midíes sean necesaries pa evitar que s’edite “La fe” de Palacio Valdés, o bien –casu que s’hubiere editao con autorización o ensin ella- que m’informe de los procedimientos oficiales pa evitar la so difusión”.
Pero, ¿qué esmolía tanto a les autoridaes? Pues la dulda. La vacilación nes sos creencies de D. Gil, un curín mozu y sensible ante’l mundu imperfectu que lu arrodia, ye un mal exemplu pal nacional-catolicismu imperante nesa dómina. L’Estáu confesional considérase na obligación d’imponer, con tou tipu de midíes coercitives y censores, una determinada creencia. “Clarín” yá anunciara la incomprensión qu’atoparía la obra; asegurábalo él desde la absoluta identificación cola novela - un testu de triba costumbrista, enmarcable dientro del realismu del XIX- y el que la firma, pero conocedor de la sociedá española del momentu.
L’autor de La Regenta comenta por carta al llavianés: “Parezme la to meyor novela”. Etelvino González destaca igualmente la importancia de la obra, qu’inspiraría, según José Luis Campal, creaciones de Pérez Galdós –“Nazarín”, 1895- y Unamuno –“San Manuel Bueno, mártir”, 1930- a la hora d’abordar el tema de la dulda.
El casu ye que l’argumentu nun solo impactó a los católicos españoles, sinon tamién a los cristianos d’otros países y confesiones. Hai que recordar que Palacio Valdés ye un de los dos o tres novelistes españoles más traducíos y lleíos fuera d’España durante’l diecinueve. Ye interesante citar lo qu’escribió sobre esti particular Francisco Acebal en 1904 en “Alma asturiana”: “Les noveles de Palacio Valdés circulen por Gran Bretaña como por patria propia, de tal manera l’alma asturiana empareya col espíritu saxón y divórciase de les sos ximielgues galaica y montañesa”.
Valdés ye lleíu y entendíu fuera; Palacio recibe cartes de llectores ingleses que comprenden y dicen sintise reconfortaos cola llectura de “La fe”. Pero resulta evidente que la obra habría de crear polémica: “Yera lóxico que la novela escandalizara”, reconozco Etelvino, “el títulu mismu endicia a ello”. Tal ye la polémica entamada que’l propiu autor vese obligáu a dar esplicaciones publicamente, en forma d’introducción, na siguiente edición de la obra, y de pasu calmar los ánimos. El nuestru autor publicare nueve noveles anteriores, más dalgún ensayu como críticu lliterariu, como’l firmáu a comuña con “Clarín”, “La literatura en 1881”, y esti estremu pesa na actitú del escritor, enfotáu en non perder llectores, como indica Campal, porque vive d’ellos.
Ésti últimu, na so “Recepción madrileña de La fe (1881)”, da cuenta del ampliu ecu que l’aparición de la novela tuvo na prensa de la dómina: El Imparcial, La Época, El Liberal, Nuevo teatro crítico, La época moderna... Les opiniones son variaes, normalmente positives cuando cinquen a la ficha técnica del testu, pero negatives cuando recurren al xuiciu moral. Calificativos como “entretenida”, “estilu fácil y cenciellu”, etc, resumen la forma de narrar de Palacio Valdés, y faen atractiva y prestosa la so llectura. Pero nel momentu nel que s’analiza la conducta del protagonista salten los resortes de la censura, rayando dacuando na insolencia y nel insultu.
L’agustinu Blanco García califíca’l testu de “novísimu enxendru”, “melodrama sainetescu” y de “impíu y siniestru”. Hasta Emilia Pardo Bazán se tira al altu al falar de les “referencies degradantes” de la historia. Pero más dañible sería l’obleru de dellos relixosos, como la del arzobismu de Sevilla, el cardenal Pedro Segura, que consideraba “reprobable” la obra desde’l puntu de vista moral y relixosu, pero sobremanera ye “escandalosa” y hasta “peligrosa” no que se refier a la “dulda relixosa d’un sacerdote, encetada por un impíu que muerre asosegadamente na so incredulidá, y los amores sacrílegos d’una beatra histérica”. Básase’l mitráu, según González, na opinión del xesuíta y críticu lliterariu Pablo Ladrón de Guevara, qu’escribe ensin arrodios: “Palacio Valdés, malu por dambes bandes, ye incrédulu. Novela “La fe”. Defensa del ateísmu, descréitu de los cures nún que se fai incrédulu”.
Así les coses, dispuestu a estripar dafechu la “incredulidá” d’esti mundu, el señor arzobismu decreta lo siguiente: “Prohibimos la novela “La fe”, de D. Armando Palacio Valdés, faciendo saber a los fieles qu’incurrirán en pecáu grave cuantos quebrantaran esta prohibición Nuestra”, como recueye’l Boletín Oficial del Arzobispáu de Sevilla de 12 de setiembre de 1947.
L’acción trescurre en Peñascosa –Lluanco-, y protagonízala’l sacerdote D. Gil, que poco dempués de quedar güerfanu de padre pierde a so madre nun actu suicida del que él llogra salvase milagrosamente. Tuteláu por una familia importante de la villa el rapaz conviértese nun virtuosu sacerdote, que vuelve al pueblu a exercer el ministeriu, viéndose col tiempu enredáu nuna trama que lu lleva a duldar de la so fe.
Esta circunstancia nun supón, según Etelvino González, una afirmación d’ateísmu del autor –que siempre fizo gala de los sos principios católicos-, sinon tolo contrario, el sacerdote atraviesa un momentu de crisis que nun ye más qu’una transición o catarsis mística que conduz a la reafirmación interior de la propia creencia: “Na novela descríbese un procesu depurador de maduración de la fe”. Trararíase “d’un alcuentru col racionalismu y una confrontación cola ciencia: el verdaderu pánicu cáusalu’l pesimismu noseolóxicu; el kantismu furtába-y la misma realidá”. Fai un correllatu Etelvino de la esperiencia vivida pola madre Teresa de Calcuta, y pregúntase si’l so escayimientu confesu d’ésta “¿sería tamién una perda condenable de la fe?”. La respuesta dala’l propiu llavianés: “D’homes ye duldar, non d’ánxeles nin de besties”. (La Voz de Asturias, 2.Xunu.2010)

Uviéu, capital

2010-05-27T10:56:00.000-07:00

La capital asturiana va ganando fuera apoyos capitales de cara a reforzar la candidatura europea: Stephen Hawking, Norman Foster, Claudio Magris, Teresa Berganza... Pero muncho más interesante que conocer los sofitos foranos, interesa saber cómo va la sumatoria interior, anque ésta algame menos glamour y menos proyección práctica. L’agrupación socialista local reclama –nun podía ser d’otra manera-, la solidaridá incondicional de los conceyos –la mayoría, del so mismu color políticu- y de la sociedá asturiana cola capital. Realmente nun se trata de solidaridá, sinon d’una manifestación d’amor propiu, pues Uviéu ye la capital asturiana y representa nesti casu -ensin reserves-, a Asturies y los sos intereses colectivos.
Ye una d’eses poques veces en que nun caben matices, aplazamientos nin reproches. Hai un momentu pa cada cosa, y sería terrible que s’enquivocaren los tiempos. La discusión política ocupa un espaciu importante na vida de la ciudá, pero ésti tien d’acotase pol bien de los propios ciudadanos –especialmente nun momentu de crisis y desesperanza-; pol bien de la cultura, de la convivencia...
Vetusta nun llogrará ser capital continental de la cultura si nun ye respetada primero como capitia d’esti pequeñu, arguyosu y rabalbu continente enllenu d’individualidaes y localismos que llamamos Asturies. Independientemente del color políticu de la corporación uviedina, o de los problemes y tensiones qu’esistan en cada momentu, ye necesario establecer prioridaes y demostrar visión llarga. Dicía Ortega que los asturianos tenemos una fuerte identidá como asturianos, pero escasa como Asturies. L’individualismu caracterízanos y divídenos de forma mui peligrosa, especialmente cuando se trata de sumar, de dar rebalgos colectivos en pro d’un interés superior.
Uviéu tien méritos de sobra qu’avalen la so candidatura europea, pero si hai enquices, que los descubran y señalen otros. Pudieron facese les coses d’otra miente, ye cierto, pero eso poco importa o tien qu’importanos agora. Como indicaba l’escritor italianu nel so escritu d’apoyu, Uviéu representa “un amable, encantador concentráu de la variedá, del pluralismu que representa la sal d’Europa”. ¿Quien va dicir lo contrario? Uviéu ye Europa en grau superior, o lo que durante 1.200 años se vieno considerando Europa; la suma de les sos grandeces y fracasos. La batalla sin fin ente lo vieyo y lo nuevo. La suma desordenada de capes y sustratos culturales que se van apinando como elementos xeolóxicos solidificaos y permanentes, que conformen lo que llamamos identidá; identidá europea, por supuesto. L’arguyu de sabese importante, y el retu de siguir siéndolo.
El mayor desafíu nesti momentu en que parez que’l continente resquiebra por mor de la crisis financiera, los asturianos tenemos que comportanos col xacíu que s’espera d’unos europeos convencíos, qu’apuesten pola permanencia d’un mundu que merez la pena, que ye –colos sos munchos errores y horrores- l’epicentru cultural del mundu, el mayor espaciu de llibertá, el mayor apueste pola paz, la convivencia y la cultura de los cinco continentes.
Uviéu ye una realidá consustancial d’Asturies y, nesti momentu encarna la so personalidá colectiva y los sos intereses, unos intereses que s’asitien por encima de cualquier griesca mezquina y partidista.

(Artículu publicáu por La Voz de Asturias el 7 de mayu de 2010)

Alcordanza del Gaiteru de Vallinaoscura

2010-05-19T05:52:00.000-07:00

Ésti vienres,21 de mayu, a les 19'15 hores celebraráse en Villaviciosa un homenaxe al Gaiteru de Vallinaoscura, fallecíu a principios d'esti añu, nun actu organizáu poles asociaciones Arribada y El Ronchel. Será na sala polivalente del Teatru Riera (Pl. Obdulio Fernández). Tuvi la suerte de conocer y tratar a Antonio Lozano, una persona escepcional, gaiteru, puyador de los ramos de la fiesta de La Cabeza de Pueyes, y una de les últimes persones que conocíen los cantos medievales de Cincuesma.

Un llibru y 6.000 lletres de pan pa celebrar la Selmana de les Lletres Asturianes na comarca sidrera

2010-05-03T10:39:00.000-07:00

Acaba de salir a la lluz un llibru n’asturianu tituláu Canigú lliterariu, que recueye obra de catorce autores de la comarca sidrera; ye una iniciativa del Serviciu de Normalización comarcal. La gran mayoría, once, son maliayeses: Iris Díaz Trancho (Pión), Xilberto Llano Caelles (Arroes), Xuan Pedrayes Obaya Obaya (El Riañu), Fernando Fernández Sánchez (La Villa), Miguel González Pereda (Coru), Etelvino González López (Amandi), Josefina Solares Fernández (Bedriñana), Javier Cayado Valdés (Rales), Xosé Manuel Valdés Costales (Quintueles), María Luis Picado Amandi (La Villa) y Lluis Portal Hevia (La Villa). Tamién aparecen dos navetes: Celia Fernández Loredo (Nava) y Casilda Ríu (La Cogolla), y un yerbatu: Xulio Vixil Castañón (Santullano).
La mayoría d’autores presenten collaboraciones de narrativa, nueve en total; cuatro aporten los sos poemes, y un una pieza teatral. La edá oscila ente los 74 años de la más veterana, y los 23 años del más mozu. El llibru presentaráse ésti xueves, 6 de mayu, a les 19’30 hores, na sala polivalente del Teatru Riera de Villaviciosa. El problema va ser facese col un exemplar -que ye la paradoxa d'estes iniciatives- porque nun va salir a la venta, esperemos que quien tenga interés en consiguilu pueda facelo.
Per otra parte, van repartise 6.000 lletres de pan nos seis conceyos de la comarca, un récord históricu, pues entamóse por repatir 1.000 lletres y esti añu multiplícase la cifra por cinco. La iniciativa fue de l'asociación El Ronchel, de magar qu'agora fízose cargu d'ella la propia mancomunidá sidrera, cola collaboración de la entidá cultural.

Natura sorprendente

2010-04-22T11:04:00.001-07:00

RARE from Joel Sartore on Vimeo.

Haití

2010-04-22T11:00:00.001-07:00

Life in Haiti-Canon 5D MKII & Glidetrack from Leclerc Brothers Motion Pictures on Vimeo.

Maldives

2010-04-22T10:52:00.001-07:00

Maldives on Rain (with timelapse) from Exmagina on Vimeo.

...............................................................................................................

2010-04-22T10:48:00.001-07:00

One day around the tower (Zaha Hadid - Marseilles) from Exmagina on Vimeo.

Día del Llibru en Villaviciosa

2010-04-18T11:02:00.000-07:00

L’asociación cultural de Villaviciosa La Compaña del Ronchel súmase a les celebraciones del Día del Llibru presentando la reedición d’un curiosu llibrín en bable, “Los artículos de la fe”, publicáu en 1916 por D. Luis Sánchez García, siendo párrocu de Samartín de Vallés y Sietes, nel conceyu maliayu. L’actu será nel Teatru Riera de Villaviciosa, el prósimu 23 d’abril, a les 19 hores. Intervendrán: Lluis Portal Hevia (Asociación La Compaña del Ronchel), Roberto González-Quevedo (Secretariu de l’Academia de la Llingua, entidá coorganizadora del actu) y Manuel Busto Alonso (Alcalde de Villaviciosa).

La obra
Esti catecismu fue escritu y publicáu en 1916 por Luis Sánchez García (Uviéu, 1879). D’esti curín sabemos que pasó dos años como capellán de Bode y Pendás (Parres). Fue coaxutor de Coya (Piloña) en 1906. Ecónomu de Pendás en 1907. Rexente de Tobes (Ribadeva) en 1909. Coaxutor de les parroquies de Samartín de Vallés y Sietes (Villaviciosa) de 1910 a 1918. Lluego, permanecería una temporaína fuera, y vuelve al conceyu maliayu, concretamente a Grases, en 1919. Ye párrocu de Rales en 1920. En 1943 pasa a la parroquia de Fuentes, onde continúa realizando’l so llabor pastoral hasta la so muerte, ocurrida’l 29 de xineru de 1964. D. Luis ye un cura recordáu y apreciáu en Fuentes, onde, a pesar de les goteres de la casa rectoral que lu obligó munches veces a metese col paragües na cama, sintíase como ún más del pueblu.

Trátase de la primera “doctrina” escrita en bable, inspirada nel Catecismu Romanu, El Perrone y les Sagraes Escritures. Nun pretende facer un testu pa espertos, esplica nel prólogu: “Ta escrito pa rapazos (y anque sea pa vieyos d’aldea y xente sencilla), non pa tiólogos y doctores, qu’esos ya saben dir a les fuentes”. “Y ta asina en bable porque paez qu’asina llamará más l’atención de los rapaces y lierán más; y liendo más, deprenderán más; y deprendiendo más... ¡Ai! home, va cambia’l tiempu, porque esti rema...”, aclara con humor.

D. Luis escribió estes 78 fueyes nel periodu en que permaneció na parroquia de Vallés, pero col tiempu perdióse’l rastru del llibru, hasta qu’hacia 1980, el cura de Santogenia –actualmente párrocu de Nava-, Eduardo Solís, atopólu casualmente y púnxolo en conocimientu del tamién profesor y miembru de l’Academia de la Llingua, Roberto Glez-Quevedo durante la so estancia nel conceyu. Pocu dempués –en 1981- l’ALLA volvía a asoleyar el vieyu catecismu, añadiendo-y un prólogu del cura de La Pola, Carlos Sánchez Martino, natural de Vallés, y un epílogu de Roberto, contestualizando la obra. La tirada fue pequeña y pronto desapareció de les llibreríes, por esa razón facíase imprescindible cuantayá volver a reeditalu.

GOLDONI NEL DÍA MUNDIAL DEL TEATRU

2010-03-26T17:16:00.000-07:00

Cada 27 de marzu, desde 1961, celébrase simultáneamente en cien países el Día Mundial del Teatru. Estrénense obres, danse conferencies, publíquense llibros, revistes... pero sobre tou ye una oportunidá pa repetir esa ceremonia, esi ritual vinculáu a toles cultures d’una o otra forma, y de la qu’arranquen tantes espresiones artístiques. Desde les antiquísimes representaciones dramátiques n’honor a Osiris a orielles del Nilu; los ecos d’Esquilo o Sófocles que tovía s’escuchen n’Epidauro o a los pies de l’acrópolis ateniense, nel Teatru de Dionisio; los espectáculos romanos n’establecimientos de madera...
Villaviciosa súmase a esta celebración col estrenu nel Riera d’una obra del clásicu de la escena, ún de los padres de la Comedia Italiana, y impulsor de la popular Comedia dell’Arte, Carlo Goldoni (Venecia, 1707 – París, 1793). Trátase d’un estrenu absolutu, y tenemos que felicitanos por ello, yá que ye una gran oportunidá de disfrutar del buen facer d’un de los principales colectivos teatrales del país: La compañía profesional Nun Tris Producciones, que lleva a escena la so versión asturiana de la obra de Goldoni “Il Servitore di due padroni”, una de les primeres pieces compuestes pol dramaturgu venecianu en 1745, y una de les más representaes del autor y del teatru italianu de tolos tiempos.
Trátase d’una de les más representatives pieces desi tipu de comedia qu’utiliza l’enredu, l’humor, l’acción trepidante, la mázcara... como señes d’identidá fundamentales. La obra ye un ésitu aseguráu polo atractivo y orixinal de la trama, a más de ser apta pa tolos públicos, y la entrada ye llibre (sábadu, 27 de marzu, a les 20 hores nel Teatru Riera). Nun hai disculpa pa nun acudir a vela.
La redacción corresponde a la maliayesa Inma Rodríguez, vinculada familiarmente con Sietes, y como ayudante de direición figura’l polifacéticu Toño Caamaño, ún de les figures más versátiles de la escena asturiana.

El cura de Fuentes

2010-03-10T17:17:00.000-08:00

Acaba de reeditase un curiosu llibrín en bable, “Los artículos de la fe”. Un catecismu publicáu en 1916 por Luis Sánchez García (Uviéu, 1879). D’esti curín sabemos que pasó dos años como capellán de Bode y Pendás (Parres). Fue coaxutor de Coya (Piloña) en 1906. Ecónomu de Pendás en 1907. Rexente de Tobes (Ribadeva) en 1909. Coaxutor de les parroquies de Samartín de Vallés y Sietes (Villaviciosa) de 1910 a 1918. Lluego, permanecería una temporaína fuera, y vuelve al conceyu maliayu, concretamente a Grases, en 1919. Ye párrocu de Rales en 1920. En 1943 pasa a la parroquia de Fuentes, onde continúa realizando’l so llabor pastoral hasta la so muerte, ocurrida’l 29 de xineru de 1964.
Trátase de la primera “doctrina” escrita en bable, inspirada nel Catecismu Romanu, El Perrone y les Sagraes Escritures. Nun pretende facer un testu pa espertos, esplica nel prólogu: “Ta escrito pa rapazos (y anque sea pa vieyos d’aldea y xente sencilla), non pa tiólogos y doctores, qu’esos ya saben dir a les fuentes”. “Y ta asina en bable porque paez qu’asina llamará más l’atención de los rapaces y lierán más; y liendo más, deprenderán más; y deprendiendo más... ¡Ai! home, va cambia’l tiempu, porque esti rema...”, aclara con humor.
D. Luis escribió estes 78 fueyes nel periodu en que permaneció na parroquia de Vallés, pero col tiempu perdióse’l rastru del llibru, hasta qu’hacia 1980, el cura de Santogenia –y profesor nel institutu maliayu-, Eduardo Solís, atopólu casualmente y púnxolo en conocimientu del tamién profesor y miembru de l’Academia de la Llingua, Roberto Glez-Quevedo. Pocu dempués –en 1981- l’ALLA volvía a asoleyar el vieyu catecismu añadiendo-y un prólogu del cura de La Pola, Carlos Sánchez Martino, natural de Sietes, y un epílogu de Roberto, contestualizando la obra.
La tirada fue pequeña y pronto desapareció de les llibreríes, por esa razón facíase imprescindible cuantayá volver a reeditalu. El volume será presentáu’l prósimu Día del Llibru nun actu al que s’espera asistan los protagonistes d’esta historia... Cásique toos, pues falten Martino y el propiu D. Luis, un cura recordáu y apreciáu en Fuentes, onde, a pesar de les goteres de la casa rectoral que lu obligó munches veces a metese col paragües na cama, sintíase como ún más del pueblu.

Xurde Blanco na Cope

2010-03-09T16:18:00.001-08:00

Una “ceremonia” mui especial n’Arbazal

2010-02-01T17:07:00.000-08:00

.

.
Facía fríu n’Arbazal, ún de los pueblos más altos del conceyu maliayés. El pueblu ye pequeñu y antiguu allugáu na ruta a Compostela. Un enclave medieval que cuenta con una capillina prerrománica dedicada a Sanzornín, el templu de Santa María construíu nel XVII, l’antiguu Mesón de Pelegrinos perteneciente al Conventu de Valdediós, una casa con reló de sol casi tan antiguu como’l pueblu...
Esti día los estrenchos y emprunaos caminos d’accesu al pueblu alcontrábense tomaos polos coches de xente qu’asistía al actu nel que se despidía a Antonio Lozano. Fue un actu mui especial y sentíu, nel que se quixo da-y el mayor adiós al gaiteru de Vallinaoscura. Tuvo presente la familia, un bisnietu, Fabián, dio llectura a unes palabres, la última voluntá d’Antonio, que pidía que la so muerte nun fuese motivu de tristeza, sinon tolo contrario, de celebración.
Antonio, cuando se xuntaba xente al so redor a cantar, a tocar, a tomar sidra, sintíase feliz; él llamaba a aquelles folixes en bona compaña “ceremonies”. La d’Arbazal fue una verdadera “ceremonia” ente familiares y amigos, ente músicos... Gaiteros sareganos de la Banda Llariegu interpretaren varies pieces nel so recuerdu.

Besos prohibíos

2010-01-12T18:39:00.000-08:00

Agora que los besos tán proscritos pol Ministeriu de Sanidá a cuenta de la nueva gripe -a toa enfermedá-y correspuende una prohibición y una censura moral-, l’ósculu conviértese, como toa transgresión, n’elementu d’interés creciente, artículu de luxu, y material de confección artística. En realidá, la obra dramática “Besos” qu’acaba d’estrenar nel Teatru Riera de Villaviciosa la compañía Contraste, lleva yá una década rodando pelos escenarios españoles ente reconocimientos de crítica y públicu, pero nesti momentu históricu adquier una nueva dimensión.
Trátase del primer ésitu importante d’un dramaturgu valencianu, Carles Alberola (Alcira, 1964), que ye al empar actor, fundador del grupu Albena Teatre, y personaxe venceyao al mediu televisivo. Carles escomenzó a escribir teatru nos años 90, y entregó’l so últimu llibretu, “13” en 2006. La obra “Besos” ye una pieza realizada a dos manes, en collaboración con Roberto García.
Besu, beisu, beso, baiser, beijo, muxu, kiss, kus, kub... Cada idioma tien la so forma y el so mou de llamalu. La palabra nos nuestros idiomes románicos posee curiosamente una raíz céltica, y como toles palabres antigües y apasionaes, dispón de varios y contradictorios significaos. Según el diccionariu de la RAE, besu ye tantu acción cariñosa como “golpe violentu que se dan dos persones na cara o la cabeza”. Na llingua de Balzac, besar significa también engañar –por aquello de Xudes, de xuro- y amorecer.
De too esto y muncho más trata la obra qu’acaba d’estrenar con ésitu de públicu –les entraes duraron 15 minutos na puerta del colexu, ¡quiero dicir de la taquilla!- y crítica’l grupu Contraste, dirixíu nesta ocasión –eficazmente, a dicir del resultáu- por Laura Iglesias, ún de los pilares d’Higiénico Papel. La lletra contién música, y los actores pasión. Desde principiu a fin l’acción nun escayez, asela cola mutación de colores y acelérase colos decibelios de la música.
Nesta vida hai siempre una melodía pa cada situación, y una situación pa cada melodía. La música relaxa o enraxona, según el momentu y el nivel al qu’hebia llegao la infidelidá na escala de richter. L’humor tolo peñera, y la gran interpretación fai que mereza la pena acercase al teatru, inclusu anque habia que pagar -o pegar- por entrar.

Morrió'l llagareru maliayu Manuel Peruyera, Manolo'l de Coru

2009-12-16T16:42:00.000-08:00

Ayer morrió'l llagareru maliayu Manuel Peruyera Peón. Manolo'l de Coru ñació en La Venta Coru en 1926. Yera un llagareru de los d’antes, fíu de llagareru, bebedor -nunca lo dexó pesie a les recomendaciones del médicu-, gran entendíu... Tenía un humor irónicu mui asturianu. La suya fue una vida entera ente toneles. Dexa viuda y dos fíos. So pá, Ceferino Peruyera, abrió’l llagar de Coru a la vuelta d’América. Corría l’añu 1914, el de la Gran Guerra europea, pero’l negociu diría, pali que pali, a más. Manolo crióse ente mayos, verines y bombes de tresegar a mano (como la que sal nel semeyu, de los años 40, nel que sal Manolo dándo-y al rabil de la bomba de tresegar). Nun había munches posibilidaes d’estudiar daquella: “daba clases con Agustín Zamorano en La Quinta”, les cuatro regles mayormente. En realidá, “la sidra ye la mi vida desde piquiñín, la única carrera qu’estudié”, reconocía nuna entrevista que-y fixi fai unos meses y que figura ente los post antiguos d'esti blog.
El vieyu llagar de Coru llegó a aprosimáse a les mil pipes de sidra mayaes na época de mayor producción. Vendín sidra en Xixón, Uviéu... Abastecín a Casa Portal en Madrid, cuando dir a la capital yera una aventura exótica. Manolo medró nesti mundu a la sombra del padre. En 1960 llegó`l momentu de baxar a La Villa, y construyó la primera nave. Col tiempu formarín un gran llagar na carretera de Fuentes, de la que s'ocupaba yá mayormente nos últimos años el so fíu, Manolo. Morrió de repente, cuando se subía al coche pa dir al hospital de Cagüeñes a una revisión ordinaria. Antes cargó nel maleteru una caxa sidra pa lleva-y médicu. Entiérrase ésta tardi. El nuestru pésame a la familia.

Una Casa-Muséu pal artista Rubio Camín en Valdediós

2009-12-07T18:00:00.000-08:00

La muerte de Joaquín Rubio Camín (Xixón 1929-2007) privó a Asturies d’un gran creador, d’un gran artista integral y con una sensibilidá especial. Fai dos años que desapareció físicamente, pero la importante obra que formó en vida nun s’esmució con él. La familia tien l’enfotu de que la casa na que viviera desde 1975, na parroquia maliayesa de Pueyes, se convierta nuna Casa-Muséu del autor... Veremos si la iniciativa prospera.
El proyectu tien varios vientos en contra: la falta d’una sinceru interés hacia la creación artística, a nun ser que se trate d’un productu procedente de Berlín o Nueva York; la incompresión hacia aquelles propuestes estétiques que tienen en cuenta la biodiversidá que nos arrodia, que nos envuelve y identifica anque nun l’apreciemos; l’apueste de los poderes públicos poles llamaes factoríes culturales –Niemeyer, Llaboral, Muséu de la Prehistoria...- que reducen la cultura a hormigón y ufierta turística.
La política confunde cultura con infraestructura. Nesti comienzu de centuria, los pintores y escultores son menos importantes que los arquitectos. Calatrava o Foster lleven camín d’eclipsar a Camín. ¿Camín? ¿Quién ye Camín? Igual da que nos refiramos a Alfonso Camín qu’a Rubio Camín, igual da que digamos pintura que poesía, Porceyu que Valdediós. Asturies ye inxusta colos suyos, anque los suyos seyan pegoyos fundamentales de la cultura asturiana, y proyección de la so vocación universal.
L’arte convirtióse nuna mercancía nesta Asturies iconoclasta y gamberra, que prefier ser fotocopia de cualquier cosa llegada de fuera que correa tresmisora d’una realidá propia, definida, identificable... Nuestra. El nuestru artista pintó, esculpió, escribió... Amó munches coses: ehí tenemos la recopilación qu’acaba facer Cubera, una riestra d’articulinos ilustraos con plumilles propies que presta ver xuntes, como muestres de la so ferviente almiración por ésti mundu que-y da la espalda.

Fronteres, un debate que repuna

2009-12-05T08:10:00.000-08:00

Cualisquier debate sobre la cuestión llingüística -y más la que cinca a los pleitos fronterizos- termina siendo una espirica política, o lo que ye lo mesmo, una espirica esquizofrénica, ensin salida racional. Nun hai nada que facer. La realidá llingüística n'Asturies ye la historia d'una llaceria anunciada, y encima -perru flacu tou son pulgues- complícase con esti enguedeyu de denominaciones, fronteres, pertenencies, nacionalidaes, filoloxíes, politiqueríes... Esta mierda de quítate tu pa poneme yo onde se mez -como nuna termomix- un mecigayu ensin sentíu onde la llingua termina siendo lo menos importante, y onde los que corten el bacaláu azorramplen, y terminen engardiéndose los tontos del pueblu -o de los dos pueblos-, los que nada deciden. Mientres tantu la mancha va espardiéndose, la mancha de la uniformización. Felicidaes a los que tienen les coses tan clares, un premiu virtual a esa xente tan solidario que nos vien a salvar a los asturianos de la nuestra inorancia, tán consiguiéndolo. Graciñas.

Un bon videu que llegará a Javier Fernández

2009-11-30T12:12:00.000-08:00

Ésti día presentóse, nel trescursu del actu de la Fundación Caveda y Nava celebráu en Villaviciosa, un videu sobre la situación del asturianu. Creo que se trata d'un bon trabayu que resume de forma esquemática pero eficaz los problemes que carez anguaño la llingua, y polo que la fundación rispe, que ye una oficialidá progresiva que nun suponga obligatoriedá, pero tampocu conculcación de los derechos de los falantes, que ye lo qu'ocurre anguaño, como denuncia la grabación. El videu, que dura pocu más de cinco minutos -subvencionáu pola Conseyería de Cultura (?), y la Caxa Llaboral- tuvo bona acoyida ente dalgunos de los cargos electos socialistes ellí presentes, que se comprometieron a facelu llegar tanaína al secretariu xeneral del PSOE n'Asturies, Javier Fernández; a ver si se-y ablandia corazón un pistañu.

Vicente Gotor, nuevu miembru d'honor de la Fundación Caveda y Nava

2009-11-28T18:43:00.000-08:00

Villaviciosa acoyó, un añu más, los actos organizaos pola Fundación Caveda y Nava n'homenaxe al ilustráu maliayu y l'acoyida d'un nuevu miembru d'honor: el rector de la Universidá d'Uviéu, Vicente Gotor. Con más públicu de lo habitual desarrollóse la ofrenda floral delantre la casa de Caveda, con una intervención d'Etelvino González, la llectura de poemes de Nené Losada, y la interpretación d'una pieza de gaita a cargu de Pelayo Coalla. Darréu, l'escenariu treslladóse a la sé de la Fundación Cardín, en La Oliva, onde se celebró l'actu d'acoyida de Gotor como nuevu patronu de la fundación. Pronunció'l discursu d'entrada Xosé Suárez Arias-Cachero, quien emponderó'l llabor académicu del actual rector y l'actitú respectu a la llingua asturiana, comparando la so figura cola del so antecesor nel cargu, Fermín Canella. Gotor, pela so parte, pronunció un discursu n'asturianu, na que defendió la vocacion asturiana de la Universidá uvieína, y la necesidá de cumplir col mandatu llegal no tocante a la llingua; al empar, agradeció de forma candial el reconocimientu que supón el so recibimientu na Fundación Caveda y Nava. Darréu dixo unes palabres la Directora Xeneral de Política Llingüística, Chelo Vega, rematando l'actu'l presidente de la Fundación, Inaciu Iglesias, quien fixo un repás a la situaci´n del idioma y les carencies que tien la política llingüística, si bien punxo l'énfasi nel compromisu que debe tener la sociedá nel procesu de recuperación llingüística. Destacar igualmente la presentación d'un videu sobre'l momentu actual que vive l'idioma, cómo lu ve la Fundación, y por qué aboga, un videu mui bien fechu que resume perbién la situación de la llingua. Al actu asistieron los alcaldes de Villaviciosa, Manuel Busto, y Cabranes, Alejandro Vega, así como la edil de Cultura maliaya, Ana López.

Un acontecimientu perimportante. Felicidaes al CAO y a tolos que participaron nesti entamu en favor de la oficialidá

2009-11-26T02:37:00.000-08:00

.
Soi de los que creen que se puede facer abondo pola llingua si hai voluntá y organización, con oficialidá y ensin ella. Que la falta d'oficialidá nun pue ser escusa pa nun desenrollar la xera que ta nes nuestres manes, y que nun se lleva a cabu, o polo menos nun se desenrolla cola continuidá y la intensidá necesaries. Na mayor parte d'Asturies nun hai una mínima organización que trabaye pola normalización social del asturianu. Hai xente faciendo coses -zona central, núcleos grandes-, pero nun ye abondo, por mui valoratible que nos abulte esi llabor, sobre tou en dellos casos como'l de la Xunta Pola. Falta coordinación, estremar la reivindicación de la normalización social, y de la política, y primar l'esfuerzu y la xermandía ente la xente que trabaya na mesma estaya.
Viví un tiempu nel País Vascu -yá sé, yá sé: ye otru procesu- y llamóme l'atención la constancia de la xente nel trabayu diariu, na organización, la responsabilidá individual y colectiva que podía esistir nuna pequeña población, con una pequeña asociación trabayando de forma continuada na normalización cotidiana del euskera. Feries, actividaes culturales, apoyu a la Korrika..., pero sobre tou, influencia nos acontecimientos cotidianos, na información, na dignificación... del idioma. (¡Y tienen oficialidá!, pero nun apigacen porque tovía queda munchu por facer ellí, onde aumenten los conocedores del idioma pero non los usuarios habituales).
Pero esta reflexón nun quita un res d'importancia a la reivindicación d'otru estatus llegal pa la llingua. Ye irrenunciable, toi d'acuerdu: imprescindible. Ye verdá que con oficialidá nun se resuelve'l futuru del idioma, pues que si nun hai verdadera voluntá política por parte de les instituciones, y sin apoyu d'otres instituciones académiques, culturales y sociales, nun se llogrará colocar un torniquete que pare la sangría permanente de falantes. La oficialidá nun ye abondo pero resulta imprescindible. Tien un valor nel tarrén de lo simbólico, y tamién produz efectos xurídicos inmediatos. La llingua precisa ser mostrada ante los propios falantes con una apariencia digna que contrarreste tanta insidia, desinformación, prexuiciu llingüísticu, xuiciu políticu... Y necesita tener un michinal, anque sea pequeñu, onde guarecese de la tormenta. Pero entrín y non, la llingua merez que-y construyamos -los que creyemos nella- un abellugu dignu, que tenga como encontiu un trabayu continuáu, gregariu, solidariu y seriu.
Felicidaes al CAO en xeneral y especialmente a Fernando Ornosa, un trabayador incansable por una idea d'Asturies. Un abrazu.

Lluis Portal: “La sociedá debe concienciase de la importancia de la llingua”

2009-11-18T15:20:00.000-08:00

Entrevista OVIEDO DIARIO
Narrador y autor teatral, l’escritor y periodista maliayés Lluis Portal obtuvo varios premios lliterios como les dos ediciones del Uviéu de teatru por Oh 36! y Poison, los de lliteratura xuvenil de l’ALLA –Pelegrinos del abismu- y Asturnews –El club de los valientes-, y apocayá recoyó’l de relatos del Centru Asturianu de Madrid. Tien publicaos un llibru de cuentos, Trófimo y Radamés, la biografía del escritor Francisco Balbín, y la obra de tipu etnográficu Secretos de Pandenes. Collabora con varies publicaciones periódiques de distintu tipu.
------------------------------------------------------------------------------------------------------------------------
--Hai una llarga tradición teatral en bable, sin embargu nesti momentu d’espoxigue de la lliteratura asturiana, nun abonden los autores teatrales.
--Ye verdá qu’esiste esa importante tradición teatral: Pachín de Melás, Eladio Verde, Antón de la Braña... Nesti momentu, el teatru asturianu tien un retu importante, que ye determinar si se sigue cola inercia del teatru costumbrista, o si son viables otres propuestes temátiques y estétiques.
--El teatru costumbrista sigue llenando teatros.
-Sí, hai que reconocer que grupos como La Compañía Asturiana de Comedies, el grupu Carbayín, Rosario Trabanco, etc. consiguen llenar los patios de butaques representando un tipu de teatru tradicional, lo cual tien gran méritu. Pero, na mio opinión -dígolo con tolos respetos hacia’l trabayu que faen estes compañíes-, trátase d’obres que nun tiene un gran valor lliterariu nin ayuda a la consideración social de la llingua.
--¿Cree posible facer otru tipu de teatru nesti momentu?
--Ye posible facer otru tipu de teatru costumbrista, más actual, qu’aproveche los resortes que faen atractivu esti teatru, esbilláu de les rémores que lu empatonen; hai dellos autores que defenden esta opción: José Raón Oliva, Dolfu Camilo...
--¿Nun hai sitiu pa más?
--Otra vía ye tantiguar otru tipu d’historia más homologable que nun tien por qué ser sinónimu de fracasu en taquilla; y impulsar la traducción escoyida, tarrén nel que yá hubo incursiones interesantes (Telón de Fondo, Casona...)
--¿Cuál ye la so esperiencia personal nesti campu?
--Contradictoria. Dos obres míes fueren premiaes y van a ser publicaes en breve pola editorial Universos, y la primera, Oh 36!, ta siendo representada pol grupu Syntexto. Esto ye más de lo que podía esperar cuando empencé a escribir teatru; de toes maneres reconozco qu’ésti ye un mundu mui peculiar, que funciona con unos patrones rabicos que nun dan muncha opción al autor teatral: esisten abondes dificultaes pa representar que ye, a la fin, pa lo que s’escribe teatru.
--Tamién fai lliteratura xuvenil.
--Sí nos prósimos meses publicaránse dos obres: Pelegrinos del abismu y El club de los valientes. Son dos novelines breves qu’esfruté escribiendo y qu’espero interesen al públicu al que van dirixíes.
--¿Resulta difícil escribir pa rapazos?
--Como pa un públicu adultu; los rapazos nun son menos esixentes que los mayores, y parezme perbién que lo sean. En cualquier casu a mi resúltame prestoso facer esti tipu de lliteratura.
--¿Qué temes abordes nestes obres?
--Aquellos que me motivaron a mi de guaje: l’aventura, el suspense, el descubrimientu de nuevos mundos... El club de los valientes ye la típica historia d’unos estudiantes que deciden formar un grupu qu’investiga histories estrañes qu’ocurren nel so pueblu. Pelegrinos del abismu aborda los vieyos atavismos y los prexuicios qu’añeren nuna pequeña y cerrada comunidá costera, visto tou ello al traviés de los güeyos de dos adolescentes.
--¿Preocúpa-y buscar temes novedosos sobre los qu’escribir?
--Non, nun m’esmuel; na lliteratura nun hai negún tema que nun tea tratáu previamente, por eso nun puedes refugar la posibilidá d’escribir llibrementes sobre ellos y dar la to versión personal y diferente sobre los mesmos. Nun se trata de plaxar a naide, pero creo qu’hai munches formes d’abordar una temática desde munches perspectives diferentes.
rong>--¿Cómo ve la situación de la lliteratura asturiana nesti momentu?
--Con esperanza. Hai abondos autores y publícase bastante, y tou ello a pesar de que la situación llingüística nun ye la afayaíza pa sustentar la creación lliteraria.
--Pero hai carencia de llectores.
--Nunca hai suficientes llectores, pero ye que nel casu asturianu hai torgues mui importantes que son extralliteraries. Yá sé que somos un pocu pesaos con esto, pero ye que la falta d’una política que garantice la pervivencia de la llingua resulta capital.
--Entós, ¿escribir n’asturianu ye un llabor militante?
--En parte resulta imposible evitalo. De toes maneres creo que la mayor parte de los escritores llogren superar bona parte de les torgues que trae arreyaes la situación actual del idioma y la falta de reconocimientu oficial; l’escritor en bable fai un esfuerzu pergrande pa tratar de desenrollar el so trabayu cola mayor naturalidá posible.
--¿Cómo ve’l futuru de la lliteratura asturiana?
--Soi optimista no tocante a la esistencia d’una cantera importante d’autores, lo que resulta mui importante pa qu’esta se renueve y tenga continuidá nel futuru. El relevu xeneracional ye clave. Y soi menos optimista no tocante a la llingua, habrá que ver si nos prósimos años se tomen les midíes necesaries pa garantizar que’l nuestru idioma siga alitando.
--¿Cuáles son eses midíes?
--Nos últimos años meyoró la consideración social del idioma, pero tovía queda munchu por facer nesti sen. Per otra parte, n’Europa, pa qu’un idima pequeñu alite ye precisa l’habilitación de midíes llegales y alministratives fundamentales. La implicación de les instituciones autonómiques, municipales, culturales, académiques... resulta vital.
--¿Y la sociedá, qué papel tien?
--La sociedá asturiana tien que concienciase de la importancia de la llingua. Pero hai que ser realistes, dempués de tantos años de relegación y obsesiva ocultación del idioma, la sociedá puede facer lo que yá fai, o polo menos lo que fai la parte más sensible y concienciada d’ésta en cuestiones tales como los derechos civiles o na valoración del patrimoniu cultural.

El bable y la Tetä del Paraguay

2009-11-08T10:53:00.000-08:00

Perru flacu tou ye pulgues. Cualquier avance por pequeñu que sea pa la nuestra llingua suscita les descalificaciones más contundentes d’unos y d’otros, non carentes d’imprecisiones, falsedaes, medies verdaes, o comparances absurdes. Pero agora l'atención alrodiu de los avances na normalización de la llingua salta'l charcu. Curioso.
El casu ye qu'atopo nuna web paraguaya, www.datamex.com.py/guarani, un post que fai una comparanza ente’l guaraní, oficial en Paraguay, y el bable a cuenta de l’aparición d’un software nel nuestru idioma. La información, firmada por Joan Moles, nun ye actual, tien yá un tiempu, pero resulta célebre y llamativa:
.
“Miren, una lengua española que no es ni plenamente oficial en su propia comunidad autónoma, el asturiano (ver mapa y más información debajo), acaba de presentar en colaboración con Microsoft un corrector ortográfico para Word con una base de datos de casi 4.000.000 de palabras (hijo, hija, hijos, hijas, etc), con una base de datos de 300 reglas sintácticas y ortográficas, con un diccionario del usuario y con una opción para sugerencias. Esto es lo mínimo que necesita una lengua para poder entrar con normalidad en la vida escolar, económica y la administración. Y ya lo tiene el asturiano –lengua no oficial ni en el Principado de Asturias pues sólo goza de protección sin ser oficial– y no tiene el guaraní. ¿Quién o quiénes han sido los culpables de no haber negociado / desarrollado con Microsoft programas en guaraní, de no tener un ente normativo funcionando a toda máquina, de no haber pactado y consensuado un Diccionario Oficial Normativo de la Lengua Guaraní, de no haber desarrollado programas libres de informática en guaraní?... ¡Y tantas otras preguntas! ¿A quién pedimos responsabilidades?
La Academia de la Llingua Asturiana (A.Ll.A) se fundó en 1981.
Se calcula que (1994) había 550.000 que personas que hablaban asturiano en Asturias, donde 100.000 hablantes lo tenían como primera lengua y 450.000 como segunda. El guaraní es como mínimo entre 10 y 15 veces más hablado que el asturiano, y el conjunto de gente que lo tiene como primera lengua, al guaraní, es algo así como 50 veces superior.
Saquen sus propias conclusiones.
Notas
El asturiano no es obligatorio en el sistema educativo. El asturiano es una lengua románica como el catalán/valenciano, el castellano, el gallego, el portugués. Todos los ciudadanos españoles saben hablar castellano y no renunciarán a ella. Tampoco renunciarán a sus lenguas los hablantes de catalán/valenciano, gallego, vasco. Los asturianos, paso a paso, están, tal vez, preparando el camino hacia la plena oficialidad del asturiano”.
.
Esti ye’l testu, saquen les sos propies conclusiones, axunto yo. Na mesma información apórtense mapes llingüísticos de la península, y una información de cierta amplitú sobre’l bable, incluyendo un trabayu de Francisco Javier Cubero tituláu La diversidad lingüística en España. Datamex ye una web billingüe que promueve la llingua guaraní en Paraguay, ente otres coses pide que la documentación y carnés d’identidá de República del Paraguay (Tetä Paraguái) y los países del Mercosur, como’l qu’ilustra esti post. Por ciertu atendi, Trevín, nun tien mala pinta el carné esti plurillingüe, ¿a que non?

Etelvino González, artesanu de la memoria

2009-11-04T11:59:00.000-08:00

.
.
.
.
.
.
.
.
.
.
.
.
.
.
Filósofu, teólogu, investigador históricu..., Etelvino González López vien desenrollando nos últimos años una actividá frenética na estaya de la investigación histórica, especialmente al traviés de personaxes de la importancia de José Gafo, Palacio Valdés, Miguel de Unamuno... Conoz perbién los principales archivos del país, y los fallos que carez la nuestra feble memoria colectiva.
--------------------------------------------------------------------------------
El Presidente del Congresu, José Bono Martínez, nun ye l’únicu que reconoz públicamente’l trabayu, ampliu y minuciosu, d’Etelvino González López. Nos últimos años, espertos de distintes estayes del conocimientu siguen con gran interés les investigaciones del versátil presidente de Cubera, al traviés de les comunicaciones presentaes en congresos, conferencies lleíes en distintes instituciones, y abundantes publicaciones, delles de valoratible grosor, que van viendo la lluz con una frecuencia sorprendente.
EL PADRE GAFO
Una de les figures que centraren más hores d’estudiu y trabayu d’archivu d’Etelvino nos últimos años fue un asturianu singular, el dominicu padre Gafo. Nacíu nun pueblu de L.lena, Tiós, en 1881, y asesináu al comienzu del conflictu bélicu de 1936, el beatu José Gafo fue un adelantáu del so tiempu. A más de l’actividá como enseñante, protagonizó una xera politica que lu llevaría a les Cortes en 1934; dos años más tardi sería asesináu xabazmente por un militante socialista. El llibru tituláu “José Gafo Muñiz. Por la concordia en España” resume en 647 páxines l’aventura personal d’esti relixosu.
Lo que sedució a Etelvino desde’l primer momentu fue la heterodoxia d’un home que quixo romper la fatalidá del maniqueísmu que dividió la sociedá española: “Gafo ye un home de síntesis”, pues trata de conciliar, de mano, lliberalismu y tradicionalismu, y más tardi catolicismu y socialismu, inclusu Ilesia y República. Esa tendencia de construir puentes llevaríalu a ser rechazáu por unos y por otros, siendo quiciás más graves les imputaciones llanzaes desde’l propiu bandu católicu.
Aborda de forma audaz la cuestión de la propiedá privada: nun la cuestiona como la isquierda marxista, sinon que la considera un derechu natural, pero pide que toos accedan a ella, dada la función social que cumple. Alrodiu del movimientu revolucionariu de 1934 n’Asturies, Gafo denuncia la represión contra la clas obrera, yá que si nun esistiera, nun habría quién desenrollara’l trabayu.
LAICISMU Y DIVERSIDÁ
Defende’l laicismu nel ámbitu del Estáu y de la organización sindical; hai que recordar qu’a los obreros obligábaselos daquella a asistir a los oficios relixosos. Gafo ye un abogáu de la causa obrera. Finalmente, destacar la defensa del autonomismu como cadarma estructural de la nación. Gafo ve nel país una patria común, una comunidá espiritual y d’interés material, pero considera fundamental respetar la pluralidá cultural y llingüística; nesti sen, aboga pol estudiu y el cultivu de les llingües perifériques, y llega a pidir que se declare llegalmente al euskera como Monumentu Nacional, pola antigüedá y riqueza qu’atesora. Esto ocurría en 1926, en plena dictadura de Primo de Ribera, lo que lo fai más meritorio.
UNAMUNO Y VALDÉS
Otra de les figures que centra los afanes d’Etelvino ye’l filósofu vascu Miguel de Unamuno. Un home que, como Gafo, vivió tiempos belicosos, y cometió tamién un grave “error”: pensar por sí mesmu sin aliniamientos interesaos, inclusu poniendo en riesgu’l so prestixu intelectual y la propia vida. Como’l dominicu l.lenizu, Unamuno ye una persona d’idees avanzaes pal so tiempu, qu’esmorga una y otra vez les propies convicciones morales y relixoses; un home que se plantea de contino duldes y interrogantes qu’intenta resolver non siempre de forma afayaíza.
Etelvino revisió bona parte de la gran producción epistolar del filósofu bilbaín, investigando específicamente los sos destinatarios asturianos; tamién analiza datos biográficos del autor non suficientemente aclariaos. Finalmente, acaba de preparar una edición crítica y documentada de los sos diarios, un garapiellu de testos que contienen detalles non estudiaos y espresiones incorrectes, que tuercen la verdadera intencionalidá del autor cuando los escribió.
Palacio Valdés ye otru de los autores asturianos que seducen a Etelvino, que estudia desayá la so obra con gran interés, llevándolu a participar en xornaes y congresos sobre l’autor de La aldea perdida. Una de les aportaciones más orixinales del maliayés al respective ye la revisión de los estudios y análisis que se faen tradicionalmente sobre la novela La fe. (Semeyu: www.dominicos.org)

Sietes, un pueblu maliayu nel imperiu de Microsoft

2009-10-26T00:31:00.000-07:00

.

.
Sietes, el pequeñu pueblín maliayés, nun solo ye conocíu polos horros y la so Casa del Horru, el so magníficu paisaxe nel camín hacia Cuadonga, o pela cercanía de la ruta de los Molinos del Profundu, sinon qu'a más, agora ye la imaxe nada menos que de la empresa Microsoft nel llanzamientu del Windows 7. Tolos vecinos, mozos y vieyos, participaron de la iniciativa que revolucionó'l pueblu durante unos cuantos dis. Aprendieron a furrular con ordenadores munchos de los que nunca tuvieron siquiera ordenador, y les cases pintáronse de colorinos, hubo hores de rodaxe, pero tamién oportunidá pa la folixa.
De momentu la iniciativa va servir pa qu'esti pueblu de la parroquia de Rales, que cuenta con ún de los pocos templos renacentistes rurales qu'hai n'Asturies, y con un chigre-restaurante, un hotel y un albergue, vea proyectada la so imaxe turística, y Villaviciosa refuerce la so fachada más cultural.

Fraga: níhil óbstat al bable

2009-10-24T12:36:00.000-07:00

La llingua asturiana ye, pa los políticos d’equí o de cullá, un elementu relacionáu cola estabilidá política. Desarmada cuantayá la columna de los pensantes y sensatos, el debate sobre’l bable pasó del campu de la filoloxía ficción, o de la filoloxía política, al de la realpolitik. Ye d’agradecer la clarificación, la tocinera verborrea dialectaloide cansaba a les piedres, y escayó de pura aburrición.
Agora la llingua afáyase frente al güe, como naquel poema de Manuel Asur, y el güe ye la figura solombrera de quien decide sobre la vida y la muerte. El güe ye quien procesa la información de los periódicos, les encuestes que reflexen la opinión pública, los intereses de partíu, y l’últimu parte médicu sobre l’estáu de la nación (y del Estáu); de la suma de tou ello resultará una decisión: solo hai dos posibilidaes, o sal sí, o sal non.
El futuru de la llingua depende en bona midida del compromisu de los poderes públicos en relación con ella. Los asturianos d’a pie, y los falantes, nun somos, nesto nin no demás, determinantes nesi futuru, la última palabra tienla’l mesmu que tien la verba primera: quien decide. Y la decisión tendrá como base referentes claros: los intereses xenerales vistos polos partíos mayoritarios, y l’estáu de les alarmes.
Cuando Manuel Fraga Iribarne-y diz a Pepe Monteserín, que nun ta en contra de la oficialidá de la llingua asturiana, y que’l bable nun ye un peligru p’Asturies nin pa España, el vieyu politicu resume tolo que se puede dicir sobre esti tema con una economía de términos que nun ye frutu de la crisis actual precisamente, sinon del pragmatismu de quien sopesa cada día les implicaciones polítiques de les sos declaraciones. Fraga, esi vieyu animal políticu que s’agarra a la vida cola tenacidá de los ganchos de mataderu, nun tien por qué combayar con naide, y menos colos hermanascos de los gallegos.
Pues ehí ta’l rueldu, y el xatu, cociando, mirando de regüeyu, a puntu de churnar. Redúzse’l círculu. Agradezse’l reduccionismu. Hai que llamar al pan, pan, y al vinu, vinu. Agora yá se sabe –si ye que nun se sabía antes- cuála ye la marcación ú se va lidiar la corrida. Los asturianistes tenemos les de perder: nun dominamos l’arte de la tauromaquia, nin tampocu’l de la política, desconocemos el de la oportunidá, y abellugámonos davezu baxo l’imperiu de la superstición.
Per una vez coincido con Fraga, el bable nun ye un peligru pa naide, nin siquiera na interpretación retorcida y interesada que confunde l’interés partidista col xeneral; el bable nun ye peligrosu. ¿Daquién más se dio cuenta?

El llibru de María Luisa Picado

2009-10-21T15:32:00.000-07:00

L’abadesa de les clarises de Villaviciosa publicó esti veranu El canto de las estrellas, un llibru qu’atropa los versos d’una vida entera. Nun soi llector de poesía, pero sí m’interesa la esperiencia vital d’una persona d’esistencia peculiar, que forma parte d’un mundu referencial cercanu, del misteriu espiritual que nos envuelve y nos identifica. María Luisa Picado pon xenerosamente a la nuestra disposición el baúl de la so esperiencia y los sos sentimientos, y los que somos amantes del llau misteriosu de la realidá solo anaguamos por abrir les leves tapes d’esti llibru d’astros lluminosos pa escucar con curiosidá insaciable les íntimes ringleres qu’impregnen les fueyes blanques d’esi papiru escribayáu que ye la so vida.
Esplica l’abadesa que tuvo qu’ordenar los poemes, revueltos n’anarquía, pa da-yos mayor comprensión. Trabayu de baldre, igual ordenar la vida que los versos que la espliquen, pues la vida de cualquiera –más la d’una monxa de clausura- ye tan anárquica como’l so sentir desbocáu. Podría pensase qu’una clarisa ye ciega y muda, y qu’al trancase tres d’una reya blanca escurez la so celda de negrura, pero María Luisa diznos que’l cielu de la suya permanez enllenu d’estrelles: un cientu d’astros brillantes que-y abren los güeyos na madrugada –siempre despiertos y allegres- y treslládenla a otres dimensiones como-y ocurría a Santa Teresa nel so viaxe astral.
L’antoloxía inclúi 73 poemes -varios d'ellos en bable-, de los que destacaría ún de los más modestos: solo nueve versos desnudos, introspectivos, emocionantes, esenciales... Dan la impresión de ser una ablana pequeña y perfeuta escondida nún garapiellu envolvente d’anécdotes, vivencies, destinaes a ser acompañamientu: les valves que protexen la perla preciosa y delicada que s’escuende nún interior de ñácar (pax. 127): Canto de estrellas. (Semeya de Vicenti Alonso)

Humberto Alonso, fíu adoptivu de Villaviciosa

2009-10-15T12:24:00.000-07:00

Colungués de la categoría d’un Braulio Vigón o un Grande Covián, el pintor -de 83 años- pertenez a una familia interesada pola cultura, la lliteratura, la fotografía... Aprendió con Alfonso Iglesias la técnica de l’acuarela, y nunca renunció a la so viveza y frescor. Tampocu renunció a les sos raíces colungueses, pero cuantayá que s’integró na vida de La Villa como un maliayés más.
--------------------------------------
El pintor Humberto Alonso recibirá’l títulu de Fíu adoptivu de Villaviciosa’l prósimu sábadu 17, según decisión tomada en plenu municipal estraordinariu por unanimidá de los tres grupos del consistoriu. La iniciativa partió de l’asociación Cubera, y contó col apoyu d’otres asociaciones locales. La decisión fízose esperar, pero finalmente llegó, y con ella el reconocimientu públicu qu’implica tal nomamientu.
Humberto nació en Colunga en 1926, y lleva viviendo en La Villa cerque de cincuenta años. Magar que nunca renunció a la so procedencia colunguesa, el nuestru artista pasa por ser un maliayés más, pues equí desarrolló bona parte de la so trayectoria vital y profesional, tamién l’artística. Casóse en Tornón con Margarita Amandi, y esa vinculación con Musllera -lo que equival a dicir cola ría-, marcaría de manera importante la so carrera pictórica.
La ría, anfibiu acuosu imponente y cambiante, alienda como un ser vivu más del nuestru entornu; les marees, les chalanes, la ribera, les playes, los porreos... son parte de la so realidá. La ría maliaya fue pintada por él milenta veces, plasmando en cada ocasión una realidá estremada y sorprendente, y una lluz que siempre resulta distinta.
Maestru de l’aguada
Intentólo de primeres col oleu, pero los sos componentes –concretamente la trementina, que sirve pa da-y solvencia a los aceites- producín-y un rechazu importante, lo que lu emburrió hacia l’acuarela. Así que terminó optando por esta técnica cabera. L’acuarela contién un pigmentu finu o tinta mecío con goma arábiga –obteníu de les acacies- pa da-y cuerpu, y glicerina o miel pa facelo llandio.
L’acuarela ye tamién una técnica qu’obliga al artista a tener seguranza nos trazos y espontaneidá nel desarrollu, ya que’l so mayor méritu ye’l frescor y la tresparencia. Nun permite l’error.
Humberto, que-y agradez al dibuxante Alfonso Iglesias -Telva, Pinón, Pinín...- ser ún de los sos apoyos durante los comienzos, ye consideráu ún de los meyores acuarelistes d’Asturies-. A los sos 83 años cuenta nel so haber con miles de cuadros de diferente formatu y temática, colgando munches les sos teles en colecciones privaes y públiques, n’importantes galeríes d’arte y en modestos establecimientos hosteleros...
La so vocación pictórica ye tan fuerte que nun piensa en tirar los pinceles nin la paleta, manteniéndo’l rítmu de trabayu, el gustu, la pasión pola pintura, pola creación... Una muestra d’ello ye que sigue saliendo al campu periódicamente colos collacios del grupu Niebla y ilusionándose cada día con nuevos proyectos.
Llargu currículum
Realiza la so primera esposición en 1956 n’Uviéu, nel marcu de la XVIII Esposición Provincial de Arte, onde consiguió’l primer premiu. Treslládase a Xixón en 1958, onde asistió a les clases de l’Agrupación Xixonesa de Belles Artes.
En 1964 marcha a Xinebra onde realizó cursos de dibuxu y pintura, ente otros estudios. Participó en más de 55 esposiciones en centros culturales y les sales d’arte con más sonadía de Llanes, Villaviciosa, Mieres, Aviles, Xixón, Uviéu, Madrid, Barcelona, Granada, Xinebra, París, Fontaine de Comte (Francia), Mexico D.F., Santa Marta (Colombia)… En 1981 participó na muestra Panorama del Arte Asturianu, celebrada nel Circulu de Belles Artes de Madrid.
En 2001 concéden-y el premiu Aula de paz, escuela asociada a la UNESCO, como pintor decanu de los acuarelistes asturianos. En 2007 recibe l’Urogallu especial con mención honorífica del Centru Asturianu de Madrid. En 2008 tributóse-y un homenaxe en Colunga por parte de l’Asociación Cultural La Huella, imponiéndo-y l’alcalde Rogelio Pando l’escudu de plata del ayuntamientu. Maliayu del Añu de la Federación d’Asociaciones de Vecinos de Villaviciosa, en 2008. Esi mesmu añu protagoniza la esposición de la Fundación José Cardín Fernández de Villaviciosa col títulu, En el Camino, y recibe un homenaxe na Residencia Miyar Somonte d’Amandi, destacando nél el talentu artísticu pero tamién la calidá humana d’Humberto.

La reedición de Peñas Cantábricas

2009-10-06T09:50:00.001-07:00

.
.

La Compaña del Ronchel acaba de presentar en La Villa la edición facsímil de la novela de Rafael de Balbín, Peñas Cantábricas, publicada en Madrid en 1908. Trátase d’una novela, como indica na introducción el nietu del autor, Rodrígo de Balbín Bhermann, asturiana y asturianista, yá que reivindica esta tierra, y pinta un mundu perfiláu col detalle del observador minuciosu, que solo una persona curiosa y vinculada con Asturies puede facer de manera tan precisa y respetuosa.
L’autor yera ún de los fíos d’Antonio Balbín de Unquera (secretariu del Conseyu d’Estáu, una persona perculta, polifacética, periodista, estudiosu, políglota... que tenía una gran biblioteca, lo que esplica l’interés de los sos fíos pola lliteratura). Otru d’ellos, Antón, fue’l primer traductor de les obres de León Tolstoi al español, tamién tornó llibros del autor de Tarzán, Edgar Rice Burroughs, ente otros. Francisco, qu’utilizó’l nomatu de Xiquín de Villaviciosa, ye l’autor d’una versión de la Canción de Roldán, y d’un llibru de poemes publicáu en Bonos Aires en 1926, De la mio Asturies. Una prima, Teresa Villaverde –Tuxa o Maruxa-, que vivió nel Palaciu Villaverde de Tornón, escribía davezu na prensa local, y ye autora de varies obres teatrales y poemes en bable.
Rafael de Balbín nació en Madrid en 1890, y morrió en 1951. Fue xuez, y llueu fiscal, en varies ciudaes como Zamora, Toledo, Valencia, Almería y Madrid; allegando a ser fiscal del Tribunal Supremu.
Como cuenta’l so nietu, Rodrigo, la so vocación yera marinera, pero’l padre tenía l’enfotu de qu’estudiare Derechu, como él y so padre, cosa que fizo, sin olvidar esa vocación.
La familia venía los veranos a Villaviciosa, tamién a Tornón, a la Casa de Marica’l Caseru, y al Palaciu Villaverde. Nel embarcaderu d’ésti últimu –que tovía esiste-, na desembocadura del ríu de Sebrayu, tenía la so chalana cola que s’aventuraba pel estuariu de la ría.
La Biblioteca Patria ye quien publica la novela, a primeros de 1908. Esta editorial editaba mayormente obres premiaes; sin embargu, la de Balbín publícase fuera de concursu, por considerase polos editores interesante y dientro de la so orientación, inspirada nel ideal moralizante de la lliteratura na llinia de quien financia aquella iniciativa, Claudio López Bru (1823-1925), segundu Marqués de Comillas. Podemos encuadrar esta novela ente la lliteratura “naturalista” y de costumes.
La historia desarróllase nun puertu pesqueru, Lloréu, que l’autor describe como un anfiteatru con so templu na rimada d’un de los cortes llaterales del semicírculu, caleyuques pindies y esbarioses, una palanca que sirve pa sacar les lanches del mar, con un caseríu anárquicu; faru, la casa del fareru, el chigre del cazurru. Unos tipos mui perfilaos: Don José, ricu prestamista, que reclama lo suyo; Manolón, pescador con mala suerte que tien un momentu de debilidá que-y condiciona la vida; Don Arturo, el cura...
Trátase d’un puertu pesqueru asturianu típicu, como podría ser Llastres o Tazones. Hai varios motivos pa pensar que l’autor tuviere mui presente a Tazones al escribir la obra: 1º- La cercanía física y el conocimientu personal que Balbín tenía de Tazones y el so entornu: la orografía, les aldees cercanes... Tazones ye’l puertu maliayés, sitúase a escasa distancia de la barra de la Ría de Villaviciosa, osea de Maquilán qu’él tantu frecuentó: separao solo del puertu pela Punta la Embesnada. Sobre les tradiciones de los pueblos, Balbín conocía perfeutamente la zona de Tornón: les xeres del campu, les fiestes, los personaxes populares, etc. Per otra parte, dalgunos términos en bable qu’utiliza son dialectales d’equí, como morción (zona de Llastres y Tazones)...
2º- Hai una identificación bastante grande de la realidá física del puertu tazoneru d’aquella época cola descripción qu’aporta del pueblu: la situación de la capiya San Roque, del faru, la piedra grande xunto al puertu, que bien podría ser la Piedra’l Caiz, etc. 3º- Aparez una Portala, nombre típicu de Villaviciosa. 4º- La familia –esto puede comprobase na introducción de la obra reeditada- considera afitao que’l puertu al que se refier Balbín, ye Tazones. 5º- Finalmente, Lloréu ye un topónimu real d’esta costa.
(Artículu publicáu nel Lletres de setiembre de La Voz de Asturias)

Llionpedia: cuando' Hitler enseña la patuca

2009-10-06T08:43:00.000-07:00

Según la prensa de la comunidá vecina, l'alcalde llionés acaba de suspender l'actividá de la Llionpedia, y de poner en conocimientu de la xusticia la posible comisión d'un delitu d'apoloxía del nacismu y del xenocidiu cometíu por ésti durante la II Guerra Mundial.
La Enciclupedia en Llingua Llionesa nun solo esquita odiu hacia Asturies y l'asturianismu -inoro la razón, si ye que l'hai-; nun solo desprecia a los propios escritores llioneses, a los principales estudiosos y cultivadores del romance; nun solo falsifica la realidá con un enfotu que sería más granible aplicáu a fines constructivos; tamién -o quiciás por eso- desprecia les normes más básiques de la convenvencia y la democracia.
Los llevantos tocineros contra l'asturianu nun son, al cabu, obsesión enfermiza de los (i)responsables de la Llionpedia contra'l nuestru idioma, sinon la forma de pensar habitual y enfermiza d'eses persones nostálxiques de los asesinos nazis.
Detallen toles obres publicaes por Joseph Goebbels, pero inoren les de Gamoneda o Luis Mateo Díez, y desprecien a Roberto González-Quevedo que fexo pola llingua propia de los lleoneses más que toa esa farxa de paletos inorantes con guiyada y boína atornillada hasta la quexada.
Tranquiliza saber que les barbaridaes y babayaes sobre tolo asturiano de talu morgazu dixital ye consecuencia del ñulu respetu de los sos responsables -y sobremanera del so cabezaleru, Abel Pardo- hacia la verdá. Magar que, perriba de la oxetividá -rebaxable a neutralidá- atópase un mínimu saber tar, la educación y la vecindá de que tien qu'orniar a los conductores d'un mediu supuestamente informativu y formativu que lleva'l pomposu nome de "Enciclupedia".

L'actu del Riera en semeyos de villaviciosahermosa.com

2009-09-13T03:42:00.000-07:00

El grupu Contraste fue'l protagonista de la nueche del pasáu vienres nel Teatru Riera de Villaviciosa. L'actu marcaba l'escomienzu de les Fiestes del Portal 2009. Con un teatru enllenu de xente -quedó públicu fuera- el grupu maliayés punxo n'escena una parodia magníficamente llevada, como siempre, porla compañía ateneína, sobre un testu de Miguel González Pereda, tituláu Evolutio. Fueren dos hores de rises, sátira, y bon humor alrodiu del tema de la Creación. Llueu procedióse a la coronación de les reines de les fiestes y la colocación de les bandes a les dames d'honor de La Villa y Comarca de la Sidra. Finalmente vieno'l pregón, y el cierre a cargu del alcalde, Manuel Busto. Un bon comienzu pa unes fiestes diferentes, les más participatives y variaes de los últimos años.

Pregón de les Fiestes del Portal 2009

2009-09-11T05:15:00.000-07:00

Alcaldes y demás autoridaes de Villaviciosa, de la Comarca de la Sidra, y de Villaviciosa de Odón. Reines y dames d’honor. Amigos y vecinos.

Anque sea un tópicu dicilo, pa una persona que nació y vivió siempre en La Villa –como ye’l casu-, supón un orguyu y una gran satisfacción lleer el pregón de les Fiestes del Portal.
Les d’esti añu son les fiestes de la crisis. En munchos pueblos y ciudaes asturianes cortaren y recortaren el presupuestu festivu de forma drástica, llegando inclusu a reducir los dis de fiesta. La Villa, por suerte, nun llegó a tantu, pero da muestres evidentes d’austeridá anque sea simbólicamente, ye’l casu del cartel anunciador de les fiestes: esti añu, como se puede comprobar, solo hai ún, el de Neto. Y el miércoles, les últimes actuaciones salen mui barates, a base d’aforrar nel apartáu de vestuariu.
En realidá, les Fiestes del Portal siempre tuvieron en crisis, que ye una forma de dicir que siempre tuvieron vives. La crisis –la que sea, tamién la económica actual- ye una situación mental transitoria que, según los políticos, tocó fondu, y agora arrástrase como un xagorra pel fondu la ría buscando la salida. Como Sovife, más o menos.
Na sociedá del ociu na que vivimos, la idea de la fiesta cambió enforma: cadún celébralo cuando y como quier, pues oportunidaes hai asgaya. Sin embargu, creo que les fiestes siguen y siguirán vives mientres siga vivu el pueblu que les allumbró, porque les fiestes son una representación –más o menos ruidosa, eso sí- de la vida de los pueblos. Les alboraes de gaita, el cultu a la Portalina, el baille de la Danza’l domingu'l Portal, la igua de los ramos, la puya, la música, la feria de ganáu, la bendición de la sidre’l duernu, la vinculación de l’aldea a la celebración... formen parte güei, como fai cien años, d’un ritual, d’una representación espiritual y identitaria profunda de lo que ye Villaviciosa.
¡Ah!, pero ¿La Villa tien identidá?
A pesar de los grandes cambios de los últimos años que l’afectaron a fondu, removiendo les coraes del so ser: la meyora de les comunicaciones, los cambios económicos, la tresformación –ye un eufemismu, claro- de l’aldea, la llegada de los emigrantes..., La Villa sigue teniendo un corazoncín que llate a un rítmu propiu y que-y permite mantener una esistencia singular. Claro qu’hai unes señes d’identidá maliayes que, anque se van esmuciendo pocu a pocu, siguen ehí presentes.
El problema ye que los maliayeses –como’l restu de los asturianos, pa qué vamos engañanos- mostramos con frecuencia pocu enfotu y gran inseguridá a la hora de presentanos ante’l mundu: somos culturalmente tímidos, por dicilo de dalguna forma. Si n’otres comunidaes se produz una cierta ‘inflamación identitaria’, equí dase precisamente’l fenómenu opuestu: contraemos de tal manera la nuestra identidá, y facémosla tan d’andar por casa, tan pequeña, tan insignificante, que llega a caber nuna caxa de cerilles.
Tenemos el casu reciente del veranu, cuando los turistes de la meseta o del sur lleguen equí ensin aliendu, asaos por un calor abrasador, atorollaos poles altes temperatures..., buscando, se supón, el frescor cantábricu. Sin embargu, el dueñu del hotel, el tenderu, la peluquera, el camareru... parecen ponese d’acuerdu pa disculpase ante’l visitante recién llegáu, a cuenta del tiempu. “¡Qué desgracia qu’orbaye!”. “¡Qué tiempu más malu traen!”. “¡Qué lata que nun puedan dir a la playa”. “Qué pena que se ñuble’l día...”.
Pena, lo que se diz pena, deberín de danos mayormente los probes diablos que nun tienen la oportunidá o’l privilexu de venir al norte en veranu, de pinguiase del nuestru orbayu, de pasiar pel monte o la playa tranquilamente, ensin que los turrie’l sol –anque sea necesariu dacuando un capiellu pal agua-. Pena sentirá’l que nun tien aire acodicionáu en casa, y nun ye a durmir por cuenta’l chornu asfisiante d’agostu. Pena, el que pasa l’añu enteru ensin prebar la sidre, o’l que nun tien más remediu qu’aguantar les ganes de comer un centollu nuna terraza de Tazones, comtemplando l’océanu...
Por ciertu, qu’hai una encuesta reciente que diz que más de la mitada de los turistes quedarínse a vivir equí permanentemente de bona gana. Sin embargu, los asturianos, debaxu d’esa capa de grandonismu llariegu que nos caracteriza, parecemos pensar a veces como aquel personaxe d’una obra de Isabel Allende que proponía vender Chile y comprar dalgo cerca de París.
Que los asturianos nos avergoncemos del escepcional clima que disfrutamos ye como si los finlandeses s’amurniasen poles ñeves perpetues que caractericen el so país –eso sí que ye pa perder los nervios-, como si en Punta Cana te recibieran con abanicos, o nel desiertu del Sahara los beduinos se comparecieren al vete sudar la gota gorda...
El clima y la orografía son elementos conformadores de l’antigua, rica y bayurosa identidá asturiana; avergonzase d’ellos ye, a la fin, avergonzase de ser asturianos, y un indicador perclaru del grau d’escepticismu que llegamos a tener los asturianos hacia lo propio.
Confesábame en cierta ocasión Manuel Cardín, emigrante d’ésitu, natural de Poreñu, y ún de los validores del colectivu asturianu en L’Arxentina, que’l verdaderu sentimientu patrióticu, el más intensu, el más incondicional, ye’l que poseen los asturianos d’acullá de la mar. Por eso bauticen los negocios que funden... con nombres asturianos de ríos, de montes, de sitios diminutos d’equí que pa ellos son, vistos na distancia, referentes xigantes que los ayuden a crear una atmósfera asturianamente respirable, y a convivir cola señaldá.
Nos años venti del sieglu pasáu, un compositor mulatu de L’Habana, Ignacio Piñeiro, compuso l’Asturias patria querida, col que quixo face-y un pequeñu homenaxe musical a so padre que, yá vieyu, y viendo de cerque’l so final, decidiera tornar a morrer a Asturies. La canción -que fue camudando col tiempu y aportaciones d’otros autores, hasta fraguar na actual versión, convertida n’himnu oficial de la nuestra comunidá-, tenía como estribillu esta frase: “Asturias, patria querida, a ti consagro mi vida”. Solamente un asturianu de la emigración ye capaz de demostrar un sentimientu tan intensu pola so tierra y la de los sos mayores. Eso ocurrió, claro, antes de que s’inventara esa frivolidá de subir al árbol a coyer la flor pa da-yla a la morena que la ponga nel balcón. A pesar de tou durante’l franquismu la canción sería recluida nos chigres, inclusu perseguida, como demuestra l’encarcelamientu del escritor Manuel Vázquez Montalbán en 1962 por cantar públicamente l’Asturias patria querida.
Dalgunos emigrantes maliayeses dexaron testimoniu de la esistencia d’una identidá local, d’un sentimientu profundu hacia Asturies, y hacia’l so pueblu, Villaviciosa al que nunca renunciarín. Ye’l casu d’Enrique Pérez Álvarez. Enrique, fallecíu en Buenos Aires en 2004, recordaba con estos versos, escritos en 1960 el momentu abegosu en que se despidió de La Villa, pocu antes d’embarcar hacia un duru y llargu esiliu –y qu’él gustaba de recitar de memoria:
Parezme que fue ayer. Atapecía.
Allegaba’l momentu dolorosu
que finxe ser allegre y bulliciosu
y ye tan amarguín: la despidida.
.................................................
Dite l’últimu adiós, villa mía,
y cuando al collumbrate, ya borrosa,
como un puntín perdíu na lexanía,
quedéme atristayáu. Mio alma doliosa
sintió que mui adientro dalgo rompía,
y sospiré por ti, Villaviciosa.
Otru casu escepcional ye’l de Francisco Balbín de Villaverde; nacíu en Madrid nel senu d’una familia esencial y visceralmente maliayesa, permaneció na capital austral hasta’l so final en 1981; a pesar de nun haber vivío nunca n’Asturies más que dalguna temporada estival que pasó en Tornón, sintió tempranamente la señaldá derivada de la distancia como pocos asturianos de nación –espresándola en bable, claro:
Nun sé qué tien nesta tierra estraña
la gaita de mio Asturies perquerida,
que con fonda tristeza sona siempre,
con tristeza infinita.
A La Villa llegaron en distintes époques personaxes foriatos que buscaron esa identidá, anque nun siempre l’atoparon o la supieron valorar.
Laurent Vital, cronista del viaxe a España del Príncipe de Gante, el futuru rei Carlos I, pinta La Villa de 1517 con una crueldá difícil de disimular: Les cases son poques y probes, a más d’escalaes. Los maliayeses yeren muertos de fame, qu’andaben descalzos -sacando los dis festivos, eso sí, en que dalgunos ponín coricies –si les tenín- y, dalgunes, una especie de botes altes-. Los homes yeren seriotes de natural y foínos col forasteru –de xuro que porque nun s’humillaben ante los ñobles y autoridaes recién desembarcaes, más que nada por falta costume-. La tierra tenínla, según él, pocu trabayada, non pola orografía, sinon por carecer de la llaboriosidá de los flamencos... ¡Vamos, que yeren unos folganzanes!
Les muyeres parecín sacaes –añadía- d’una época remota y primitiva por demás. Cuenta que llevaben unos espectaculares y ridículos perifollos enrollaos na cabeza que s’asemeyaben a barquinos de fragua o coriyos de la ría col picu apunciáu p’arriba. Ponín medies encarnaes –si les tenín- sin lliga nin otra cosa con qué sosteneles, razón pola cual se-yos plegaben, arrugaes, nes canilles -cotillea Vital.
“Les muyeres casaes –tamién mete nel paquete a los mozos solteros- son pocu o nada agraciaes”, asegura sin vergüenza, diz que van vistíes con tela bastu de llinu, y porten un lixeru xugón recortiáu y ensin mangues. De les sos oreyes abiertes lleven colingaes crucines de plata los dis de fiesta, y aros... Al cuellu porten abondos y paxareros colgantes con cuentes d’acebache, ámbar y coral. Finalmente, son tan pocu serviciales y refinaes, que tienen qu’arremangase les propies dames de la corte flamenca pa iguar la cena de los recién llegaos.
Claro, lo que nun cuenta Laurent Vital –dexando a un llau los evidentes prexuicios casi racistes, y les comparances tan fuera de llugar cola próspera Flandes-, ye que La Villa, a más de ser un pueblu pequeñu y mui modestu nún país de la periferia europea, sufriera un incendiu non munchos años antes, que l’afaró dafechu; qu’a les sos costes llegaben de continu barcos corsarios qu’arrasaben pueblos y aldees, incluída la propia Villa. Y encima, cáe-yos del cielu un príncipe que naide sabe d’onde sal –que de mano confunden col turcu-, arrodiáu de cientos de cortesanos, guardianes y sirvientes, a los que nun saben cómo tratar nin qué ofrecer.
Bien diferentes son les apreciaciones del novelescu caballeru Don Pelayo, Infanzón de la Vega, protagonista de la obra escrita pol cura maliayés Bernardo Ribero Larrea en 1792, El Quixote de la Cantabria, que recordaría de por vida la so llegada al pueblu y el tratu que-y dispensaren equí: “Llegó con mucho día Don Pelayo a Villaviciosa, lo que fue motivo para que después de refrescar pasease por La Villa, y se hiciese cargo de ella: causóle mucho gusto la abundancia de aguas, llamáronle la atención muchas buenas casas, y notó que era una pequeña población muy provista de todo comestible, hermoseándola también un poco de comercio”. Dempués describe les virtúes de la posada na que s’agospió, de la posadera, procedente de Cabranes, de la so fía –de la que quedó perdidamente namoráu- y, sobre tou, de la gran escudiella de ñates con azucre qu’ésta-y preparare.
El criyáu del famosu caballeru, Mateo, maliayés de pro, defende allá onde va la moralidá de los habitantes del so pueblu con uñes y dientes, como naquella oportunidá en que caleyando pel mundu alantre -creo recordar que per tierres de Valladolid-, presentóse-yos una cómica teatral -profesión bastante mal vista daquella, por ciertu-, que dicía ser de Villaviciosa. Repuchóse Mateo sin consideración hacia la rapaza, esclamando engafentáu: “¡N’Asturies nun nació tovía una comedianta!”. Y ante la insistencia d’ésta en defender la so procedencia maliaya, escurre aquél pone-y una prueba que la desenmazcare dafechu, preguntándo-y pol númeru de caños de la fuente de La Villa; pregunta que nun tuvo contestación afayaíza.
Sicasí, intervino en defensa de la muyer l’Infanzón de la Vega, diciendo d’esta manera: “En eso de caños, de un año a otro puede haber notable diferencia”. Pero atayólu Mateo deseguida con un argumentu d’autoridá sin retruque posible: “Los caños [de La fuente de la Villa] nunca se mudaron: ellí los ve vusté correr de día y de nueche que parez una hermosura”.
Quiciás estos personaxes lliterarios fraguaron un positivu conceptu de La Villa y los villanos, en definitiva da-yos vida’l cura Ribero, que por dalgo yera de Fuentes, pero ente los personaxes reales que nos visitaron a lo llargo del tiempu nun abunda precisamente la consideranza nin l’amabilidá de xuiciu del Infanzón y Mateo.
Así, el filólogu y aventureru británicu George Borrow, que pasó perequí en1837, describe na so famosa obra La Biblia en España, a La Villa como “ciudá pequeña y sucia al borde d’una ensenada que comunica col Golfu de Vizcaya. Suel llamase a Villaviciosa la capital de les ablanes –diz-, pola inmensa cantidá d’esi frutu que se cosecha, la mayor parte esportada a Inglaterra. Al acercanos al pueblu, algamamos munchos carros d’ablanes que llevaben la mesma dirección nuestra. Dixéronme que na rada había avaraos dellos barcos ingleses”. Los sos habitantes son repunantes y parez que nun se dediquen a otra cosa aparte de producir ablanes. Sin embargu, naide-y ofrez un puñáu d’elles pa probales, y cuando lo faen, resulta que son valeres. El so amigu Richard Ford, que recorrió Galicia y Asturies per aquelles feches, tampocu atopó otra cosa destacable más que´l frutu secu, y a los sos supuestos “secos” habitantes.
De xuro qu’esti pueblu nun ye’l meyor del mundu, pero da la casualidá que ye’l nuestru. Gustará más o menos a los que nos visiten, pero sobre tou a quien tien que seducir cada día ye a los propios villaviciosinos, que tenemos la obligación de mirar por él, de facelu cada día más habitable, sin perder la noción de permanencia histórica y cultural.
Nun solo nun hai qu’avergonzase de ser maliayos o asturianos, hai qu’afirmar una identidá que ye’l nuestru adn, la nuestra raíz..., que somos nosotros: los nuestros sentimientos, los nuestros recuerdos... La identidá humanízanos, oriéntanos, fainos orguyosos de ser persones, ponnos nel mundu y reconcílianos con él. Por eso solo puede estrañar qu’un importante responsable políticu dixera apocayá que fomentar la identidá asturiana crearía recelu nel restu del país; a Asturies, la tierra más solidaria d’España, nun pueden pidí-y que se sacrifique más de lo que ya se sacrificó a lo llargo de la historia.
Nosotros, maliayeses de toles époques, de tolos tiempos, somos los únicos que conocemos los verdaderos secretos d’esta tierra. Agora solo nos falta afrontar de forma digna el gran retu de legar –amorosamente y ensin restricciones- a les futures xeneraciones la esencia d’un mundu que se llama Ríu Llabiargu, Arnín, Los Ombos, Tandión, La Madrera, Peñacabrera, Arbazal, Cuatro Xueces, Llonxes, Llorea, La Ñora.
Pa rematar, y volviendo a les fiestes, quiero recordar les palabres prenunciaes esti día pola edil de Cultura, Ana López: nun olvidéis que les fiestes nun les fai l’ayuntamientu sinon la xente, y que se celebren pa ser disfrutaes por nosotros y polos que nos quieran acompañar estos dís.
Así que yá sabéis... ¡Disfrutáiles!

Lluis Portal Hevia
Villaviciosa 11.09.2009

Día d'Asturies: celebración, reflexón y propósitu d'enmienda

2009-09-08T02:38:00.000-07:00

.
.
.

Espero qu'esti día sirva a los asturianistes pa reflexonar sobre les cuestiones esistenciales que tantu nos esmuelen. Tengo pocu enfotu, pero soi ún de tantos que mantién viva -¿con respiración asistida?- la esperanza de que l'asturianismu maurezca dalgún día d'estos (si tarda munchu, ya nun va facer falta). De momentu, deséovos a tolos asturianistes que tengáis un magníficu día de folixa. ¡Puxa Asturies!

Bon cartel de Neto pa les Fiestes del Portal

2009-09-02T10:46:00.000-07:00

Vasos de sidre ergonómicos

2009-08-26T08:53:00.000-07:00

Fai unos cuantos años, pues como venti, tando en Bilbao –¡Oh meca del nacionalismu!-, pidí sidre nun chigre; coincidió que la sidre que tenín nun solo yera asturiano, sinon a más de La Villa, lo que me defraudó abondo pues pretendía prebar la bebida vasca per primera vez y nun pudo ser daquella; sirvínlo nun vasu baxu qu’equí se conocía hasta apocayá como ‘pinta’ pal vinu.
Fai menos tiempu, nel Corte Inglés d'Uviéu, había a la venta vasos d’esi tipu que, paradóxicamente, llevaben una etiqueta que ponía “vasos de Villaviciosa”. Supungo que dalgún cristaleru vascu pretendía relacionar publicitariamente varios conceptos aparentemente bien estremaos. Sicasí, col pasu’l tiempu y l’espollete de la sidre vasco, fue faciéndose corriente nes sidreríes –llagares/restaurante- y chigres vascos el campanu, siendo nesti momentu yá ye habitual velu non solo nes sidreríes y sitios nos que se viende esta bebida, sinon tamién en toa triba de cafeteríes, chigres y pubs, como recipiente nel que se sirven toles bebíes.
Pero inclusu van más allá n’Euskadi.
Fai una temporaúca, tando de nueves en Bilbao, ciudá más acodiada y fachendosa que dos décades atrás, decidimos xubir colos nuestros amigos bilbaínos Maite y Antonio al monte Artxanda en teleféricu, una zona verde asitiada sobre la capital vizcaína, como un balcón privilexáu frecuentáu especialmente los fines de selmana. Pidimos sidre y, curiosamente, sirviéronmoslo nunos vasos tipu campanu, pero con una forma peculiar, una forma ergonómica que facilita garrar el vasu con más facilidá y seguranza, mesmo a la hora d’escanciar –si ye’l casu- que d'acercalu a los llabios. Nun hai nenguna diferencia apreciable más col campanu tradicional, y supongo que la iniciativa, parta de quien parta, tien más que ver con una propuesta estética qu’otru tipu de planteamientu.
Yo solo doi cuenta d’esta iniciativa que me llamó l’atención.
¡Ah!, por ciertu, qu’esta vez la sidre sí yera vasco, de Bereziartúa (Astigarraga-Guipúzcoa), y bien bono.

Desaparez la Banda de Música de Villaviciosa

2009-08-21T07:04:00.000-07:00

Diz que la Banda de Música de Villaviciosa nun volverá a tocar. Ésta ye una mala noticia, si finalmente se confirma. Cuando calla un músicu apágase una estrella, y aumenta la cacofonía del mundu. Ye una desgracia colectiva que los instumentos s'arrinconen y dexen de sonar. Inoro les razones últimes de qu'esto pueda ocurrir. Desconozo si son motivos económicos o burocráticos, falta de sabia nueva o cansanciu de los responsables; quiciás un tiñalgu de tou ello.
La Banda de Música nació na década de 1880, siendo dirixida por Luis Amandi Martínez, 'Moya', procurador de los tribunales y empleáu municipal; nel 1902 figuraba al frente José Murguía Acosta, al que sucedió Ramón Alonso Vallina, encarceláu durante la guerra civil -la prisión quedaba al cabu del local d'ensayu, ¡coses de la vida!-, que morrería pocu después d'acabase'l conflictu.
En 1938 entama una nueva época, dempués de facese una soscripción popular a tal fin, siendo alcalde Juan Valdés Suardíaz; pel mediu suscitóse una polémica local a causa de la prestación de los instumentos a la banda de La Falange d'Uviéu. En 1939 el xoven músicu y compositor Juan José García Renedo, avezáu ya a la dirección de bandes locales, consigue facese cola dirección de la formación en concursu abiertu. Nel 1959, problemes de tipu económicu terminen prácticamente cola llarga trayectoria de la formación musical maliaya, que nun volvería a renacer hasta finales del sieglu pasáu, 1998, por iniciativa municipal y antiguos componentes integraos na Asociación de Amigos de la Música de Villaviciosa.
Tres directores tuvo nesta nueva etapa: Davil Howard, Juan José García Rodríguez-Renedo, y l'actual, Luis García.
La Banda de Música ofreció la oportunidá a munchos, rapazos y maduros, de deprender un instrumentu, animó actos oficiales, procesiones, fiestes diverses, la Danza del Portal... La Banda fizo remocicar a los vieyos -que tovía recordaben con señaldá los dis heroicos de la formación-, pero tamién se fizo valir ante los escépticos, o los que nun conocín lo que yera una banda d'estes característiques.
De xuru que nun va tocar yá nes prósimes Fiestes del Portal, como tampocu lo fizo na Selmana Santa maliaya, y eso ye un drama, una derrota de la música y del arte. Un aprobetayamientu de la vida cultural de Villaviciosa. Esperemos que los filispos d'esperanza que puedan esistir tovía, se fíen y priendan en prósimes feches.

Rodiles, lo prohibío

2009-08-13T17:55:00.000-07:00

Dalgún efectu purificador debe tener el mar cuando masivamente nos acercamos a él al llegar el buen tiempu. Los maliayeses del s.xix, acudín en coches de caballos a El Puntal a tomar los baños curativos que recomendaben los médicos pa diverses enfermedaes como l’anemia, les afecciones del sistema nerviosu, l’asma crónicu, los apustemes de la piel, y como parte del procesu de rehabilitación por rotures de güesos, esguinces, etc.
Desde los tiempos antiguos, el mar ye sinónimu de salú y bienestar. A ello sumóse, a lo llargo de la pasada centuria, la cultura del ociu. De repente, descubrimos la playa, y ésta conviértese nun escenariu pa la recreación y el descansu. Pal turista d’interior, acudir a la costa ye un imperativu impuestu pol clima y la necesidá de ver el mar. Pa los ribereños prima quiciás –munches veces sin sabelo- la parte profiláctica, relaxante y curativa. La forma en que los vecinos de La Villa esfrutamos de Rodiles, pongamos por casu, ye diferente a cómo lo faen usuarios procedentes d’otres zones d’Asturies o de fuera, siendo importante la cantidá de persones que siguen prefiriendo El Puntal.
La estancia na playa pa nós ye, polo regular, más breve, como de visita de médicu, y sigue teniendo más que ver col bañu que con tomar el sol, como si siguiéramos un ritu ancestral y atávicu, centráu na salú –en bona parte na necesidá d’escorrer l’estrés- perriba d’otres consideraciones.
Nos dos últimos años, cada vez se ven más vecinos de La Villa n’otres playes centro-orientales... El modelu de playa metropolitana diseñada pol Principáu pal arenal de Rodiles, con aparcamientos perfectamente acotaos, zones de dunes vallaes, la ‘preservación’ del ocalital, etc, dificulta l’esfrute de la playa como zona natural, de visita breve, sin acotaciones, sin estaques llendando l’horizonte, sin normes y prohibiciones propies d’una población. La playa ya nun ye un mundu más o menos natural, un mundu aparte que visites a la carta, llibre y purificador, sinon una estensión de la ciudá metropolitana, con códigos urbanos, onde tolo que nun se prohíbe, ye obligación.

“La sidra ye la mi vida desde piquiñín, la carrera qu’estudié”

2009-08-01T14:37:00.000-07:00

PERSONAXES MALIAYOS

Manuel Peruyera Peón. La Venta Coru (Villaviciosa), 1926. Llagareru de los d’antes. Fíu de llagareru. Fíu d’indianu. Paisano. Bebedor. Entendíu. Humor irónicu y con espoleta. Una vida entera ente toneles. Ente mazanes y buruyu. Ente corchadores, mayadores y botelles de xixón. Caxes de madera, de plásticu... Un de los últimos llagareros con sonadía, de los que mantuvieren la puerte’l llagar abierta cuando la crisis, la gran crisis, la que cásique desaparez del mapa la sidra, “como desaparecieren los coches de caballos”.

Lluis Portal
Ceferino Peruyera abrió’l llagar de Coru a la vuelta d’América. Corría l’añu 1914, el de la Gran Guerra europea, pero’l negociu diría, pali que pali, a más. Manolo crióse ente mayos, verines y bombes de tresegar a mano. Nun había munches posibilidaes d’estudiar daquella: “daba clases con Agustín Zamorano en La Quinta”, les cuatro regles mayormente. En realidá, “la sidra ye la mi vida desde piquiñín, la única carrera qu’estudié”, reconoz.
El llagar de Coru llegó a aprosimáse a les mil pipes de sidra mayaes na época de mayor producción. Vendín sidra en Xixón, Uviéu... Abastecín a Casa Portal en Madrid, cuando dir a la capital yera una aventura exótica. Manolo medró nesti mundu, a la sombra del padre. En 1960 llegó`l momentu de baxar a La Villa, cola primera nave. Vendíase bien la sidra, nun había tanta competencia como agora.
OTRES ÉPOQUES
“Daquella, p’hacia agosto ya habíamos corchao, y acabábase pronto la sidra”, recuerda’l llagareru, por eso había mester de recurrir a otros llagares más pequeños a los que-yos compraben la producción: “Corchábamos en llagares como’l de Mancio, El Trole, en Puntal no de Busto; díbamos hasta Nava, al Piloñu, Estrada...”. “Un llagar famosu daquella era’l de Contrueces, mayaba más de mil pipes y facía mui buena sidra”, pero como diz Manolo, “los tiempos cambiaron”.
Na bodega de Coru “descargábamos los camiones de mazana a cestaos, y otros espalando, non había basculantes”, pero sí xente pa trabayar, “ahora non quier trabayar nadie”. El llabor nel llagar nunca s’acaba, sábelo bien él y la so familia, el fíu, Manolito, que lleva’l pesu de Sidra Coru nesti momentu. Entamóse con una nave onde había llagares, toneles, los argadiellos de mayar, en mediu la bodega echábase la mazana cuando llegaba’l tiempu d’ello.
EVOLUCIÓN CONTINUA
Siendo tiempos duros, la sidra tenía salida. Yera otra triba de sidra, habríalo peor pero tamién meyor: “Había toneles que superaben a los d’ahora”. “Daquella había munches más variedaes de mazana: perra cabiella, fréjol, montotu, de l’arbeya, durona, valbonís..., inclusu’l mingán dába-y un buen sabor a la sidra”, recuerda Manolo. Esa mezcla y otra forma de procesalo daba un resultáu que podía llegar al sobresaliente: “En Coru teníamos toneles que tenín un pegue mui finu. Aquel pegue tan guapu ya non lu hai”.
De toes maneres Manuel Peruyera defende la sidra que se fai na actualidá: hai más medios, más técnica, más comodidá, llagares más potentes y que nun hai qu’apertar. La bodega conserva la primera nave con 31 toneles de madera, un espaciu únicu, el mayor patrimoniu del llagar; el segundu edificiu ocúpalu una filandrada de grandes tinos de poliester; a la otra mano otra alliniación de toneles de castañu; la tercera nave alberga diez prenses, de les que dos son circulares, de propulsión hidráulica, el restu tradicionales de dos fusinos. Na parte trasera hai tres canigús modernos nos que se recepciona la mazana, que se llava y pasa a una cita na que se llimpia de fueya y fruta picáu, y d’ehí a la mayadora y les prenses. La producción espoxigó abondo nes últimes décades. Agora, munches bodegues tienen fríu, nel so llagar tovía nun lu hai, pero Manolo, cuando enfría’l tiempu, de nueche abre les ventanes.
El llagareru recuerda la fuerte crisis que padeció’l sector y qu’obligó a cerrar munchos llagares. “Hubo años que non se vendía nada”, sin saber mui bien por qué. Llegó a pensase en facer una fábrica ente unos cuantos llagareros, pero al cabu la idea amaliñóse por nun ser quién a decidir ónde se construiría. “Acuérdome que Muñiz dicía qu’había pasao’l tiempu de la sidra, como había pasao’l de los carros y los caballos”. Por suerte aquelles palabres premonitories nun se cumplieron, pues esti productu degoló les dificultaes hasta llegar al momentu actual, de gran consumu pero tamién de saturación de la producción pol gran crecimientu de les bodegues.
ANTIGUAMENTE "ECHÁBENSE LOS TONELES A LA CANIYA"
Habrá quien piense que la sidra embotellóse y corchóse tola vida, pero nun hai tantos años, esta bebida tomábase en xarres, o en vasos gordos y baxos, ensin escanciar. Nos llagares familiares poníase un grifu como espicha y vendíase la mayor parte así a los vecinos: “Corchábase mui pocu, acuérdome bien que s’echaben los toneles a la caniya. Llevaben munchu pa les cases a garrafones. Na zona Coru había llagares asgaya: Vallina, Canor de Perniles, Costante Remiendos, Xaular, Pepón, La Fina, Laureano, José Xico, Celesto’l Nin, en Seli na Caballona... mayaben munchu”. “Claro, lo últimu taba avinagrao, como pa ensalada... y casi lo primeru tamién”, diz Manolo muertu risa.
Pero eso ye la prehistoria de la sidra. L’usu de la botella diría imponiéndose y convirtió’l sector nuna industria, con formes y técniques tradicionales, pero industria. El corchar facilitaba’l tresporte y tamién obligaba a facer un mayor esfuerzu por ofrecer calidá. Munchos de los nuevos impulsores de la sidra regresaben de facer les amériques con idees más modernes y dineru pa invertir.
TINOS DE POLIESTER Y SIDRA IDEAL
Manolo reconoz les virtúes de los nuevos materiales que conviven cola tradicional madera, anque les dos realidaes tienen característiques estremaes. Los grandes tinos de poliester qu’enllenen una de les naves “mantienen el carbónicu” meyor que los toneles de madera, “más porosos”, y eso nótase especialmente “si la sidra ye tardíu”. De toes maneres, si la madera se conserva bien, el tonel da-y un valor al conteníu, sabor, color... “A mi gústame más lo de tonel... si ta bueno”.
Si hubiera que definir lo que ye una sidra ideal, Manolo tienlo claro: “la sidra tien que ser fino, de color apajadino, que se pegue nel vasu, vamos que tenga pegue –que non suel ser habitual-“. A él siempre-y prestó tomar sidra, pero la edá y dalguna maliquera reducen esi placer a la mínima espresión: “Después de vieyu ya nun vales pa nada”.
Pero’l veteranu llagareru de Coru sigue mui pendiente de les coses del llagar nun momentu en que les maseres tán pingando ante una nueva campaña, y eso que “esti añu non queríamos mayar munchu” porque la venta reducióse y les coses nun tan pa munches alegríes.

Publicao nel periódicu El Fielato (Prensa del Oriente)

Semeyos del veranu en República Dominicana

2009-07-29T15:34:00.000-07:00

El requexu d'Obaya

2009-07-28T00:18:00.000-07:00

El cordal d'El Sueve guarda nel so senu abondos requexos escepcionales, ún d'ellos ye'l d'Obaya. Resulta recomendable pa una tarde de veranu descubrir esti enclave de clima tropical, con una vexetación sorprendente y bayurosa, destacando la variedá de felenchos. Ye recomendable primero visitar el Centru d'Interpretación del Sueve, asitiáu nes antigües escueles de Gobiendes, ellí podemos internanos na biodiversidá d'esti espaciu, información de visites guiaes, etc.
Desde les escueles endícieste hacia' núcleu principal de Gobiendes, y, darréu aparecen indicadores d'una ruta d'horros con paneles esplicativos, mui didácticos, y lletreros que nos empobinen hasta'l nuestru oxetivu: Obaya. Hai un momentu en que'l camín conviértese nuna caleya estrencha; si vas en coche déxeslu equí y empieces a caminar: a pocu más d'un kilómetro lléguase al ríu d'Obaya, atravieses un puente nuevu de madera, y al pocu tópeste col nacimientu del ríu, varies fuentes y regatos que confluyen nun mesmu calce. Hai restos de polo menos dos molinos de considerables dimensiones, pela puerte d'un d'elles surte una corriente d'agua que llega a ser grande n'époques de lluvia, formando un remexón.
L'agua baxa per ente grandes piedres y peñascos redondos, completamente cubiertes de mofu. Al fondu va estrechándose l'espaciu hasta facese inaccesible. Ente los molinos, que dexamos a la derecha, puede subise hasta una zona de cueves. Nun ye complicáu l'accesu si se va con calzáu tresnáu. Hai varies cueves que son utilizaes polos animales como abellugu, y una que tien salida posterior, convirtiéndose nun túnel realmente, bien transitable.

Presentación de llibru con polémica final

2009-07-13T08:16:00.000-07:00

Esti día presentábase nel club de prensa de La Nueva España l'antoloxía poética de Lluis Xabel Álvarez, 'Poesía Asturiana Completa'. Poca xente nel actu, especialmente cuando se trata d'un personaxe que ye historia del Surdimientu. Xente mayormente ayeno a la reivindicación llingüística -collacios, dalgún profesor de la Universidá, l'exconseyeru Bustillo...-, cola esceición de Faustino Álvarez, Antón García, Xulio Vixil... De l'Academia, el secretariu, Roberto González-Quevedo, que presentaba l'actu. Presentación emotiva con perfil del personaxe y unes pincelaes sobre l'autor, que finó recitando de memoria los versos de la famosa y emblemática 'Céltica'.

L'escritor y críticu lliteraritu José Luis García Martín, diseccionó la obra que se presentaba col detalle propiu d'un ciruxanu, meticulosu y detallista. Destacó obres intimistes como 'Repasu', que faen referencia al ámbitu personal y familiar del autor, pola so fluidez; l'humor que rezume d'otres varies pieces, un humor que nun ye l'humor asturianu -aclarió Martín-, sinon un humor enllén d'ironía culta, un humor ellaboráu, que vistu al bellume muéstrasenos na so verdadera dimensión, que plaga los sos versos de forguites de filosofía, y alluma en cada poema un mundu estremáu; tamién emponderó la rima impresionista de 'Páxaros y atapecer en Finlandia' y 'Nel intre'. Martín destacó que Lluis Xabel nun ye autor de poemarios, sinon de poemes. Finalmente, el críticu manifestó'l so desacuerdu cola inclusión nel volume d'un tributu a Carmen Conde, que na so opinión nun iguaba col restu. Nel so criteriu, un bon poeta nun precisa publicar munchu, sinon bono, yá qu'a los bardos importantes recuérdaselos quiciás por media docena d'obres.

Faló dempués Consuelo Vega, directora xeneral de Política Llingüística, que fue alumna del escritor, del que destacó la so mente abierta y la so dimensión de escritor y protagonista de primera llinia dende los años 70 na reivindicación llingüística. Finalmente, sorrayó'l so sentíu del humor y la ironía asturiana que marca la obra de so.

Lluis Xabel leyó varios poemes, fixo un repás de la so trayectoria como escritor, xustificó'l fechu de que los ensayos de filosofía los sirviera en castellán, y renovó públicamente'l so compromisu pa cola llingua nun momentu difícil pa la so supervivencia. Nesti puntu, citó de forma espresa'l papel que vien teniendo la FSA no tocante a la llingua, la so actitú cegarata no tocante al nuestru idioma, nesti sen manifestóse, tres la intervención d'ún asistente, mui críticu col partíu principal del Gobiernu, y cola ausencia d'avances claros en trés décades y dos xeneraciones d'asturianos frustraos por cuenta una llucha enllamuergada que nun llogra l'ecu afayadízu.

Intervino entós Consuelo Vega acotando cola responsabilidá de los ciudadanos asturianos, planteamientu que foi defendíu con abondu mayor entusiasmu aínda, por Martín, quien defendió encegoladamente dos idees: la oxetividá d'esa responsabilidá colectiva, y la meyoría incuestionable -según él- de la llingua al cabu de 35 años.

Supongo, y esto yá ye opinión personal, qu'en realidá Martín quería referise a la lliteratura, que sí espoxigó enforma nestos años, o la conciencia llingüística, porque la situación del bable reculó hasta la situación que cualquier observador detecta -y les encuestes del Principáu-, y que ye cercana al desaniciu. En cualquier casu, la teoría de lo "incuestionable" daría munchu de si.

Sobre la responsabilidá difusa que planteen Chelo y García Martín hai que dicir, qu'efectivamente esiste una responsabilidá colectiva, pero al colectivu, a los asturianos, a la sociedá y los sos intereses, represéntenlu les instituciones, que vemos cómo vela por tantes propies y ayenes sin esperar a que los ciudadanos tengan que manifestase na cai pa consiguilos. El Gobiernu tien unes responsabilidaes (constitución, estatutu, Llei d'Usu, Conveniu Européu...) pa cola llingua, pero'l casu ye que non solamente nun fai lo que tendría que facer, sinon qu'hai abondos indicios que nos lleven a concluir que se trabaya en contra del bable.

Nesti sen, habría que preguntase si contribúi a la normalización llingüística que los másimos responsables de la FSA realicen llamaes amenazantes a los alcaldes socialistes favoratibles a la oficialidá; si les presiones a les agrupaciones locales comprometíes cola llingua son de recibu; si ciertes referencies al terrorismu ye aceptable y propia de políticos demócrates; si la involución evidente que se vive nesta formación política ante la reforma estatutaria hasta'l puntu de poner en dubia la llegalidá de la Llei d'Usu, o la propia esistencia del idioma, ye comprensible; si l'actitú del PSOE ante l'informe de la Unesco en relación cola desaparición del asturianu ye la afayadíza; si'l planteamientu en relación cola enseñanza del idioma (plantiyes orgániques, formación del profesoráu, especialidá de llingua, oposiciones, calidá de la enseñanza, valoración de conocimientos, etc) resulta razonable; si l'incumplimientu del mandatu constitucional sobre la oficialidá tien esplicación posible; si la presencia del asturianu nos medios públicos ye la más acodiada y cumple col mandatu llegal y estatutariu... Entiendo que l'administración tien obligaciones pa col idioma y la primera ye facer lo posible por evitar qu'ésti desapareza; mientres nun esista la voluntá de pone-y torna al desaniciu, mientres se relacione identidá con desestabilización, y se dulde de la naturaleza mesma de la llingua, difícilmente se podrá señalar al ciudadanu col deu.

Pero un planteamientu resulta especialmente retorcíu, y ye eso de que quien quiera bable, que lu vote.